Pedagogik işgärleriň usuly-amaly maslahaty geçirildi

           “Garaşsyz, Baky Bitarap Türkmenistan--bedew batly at-myradyň mekany”  ýylynyň ilkinji günleri şanly wakalara beslendi. Türkmenistanyň Bilim ministrliginiň 2025-nji ýylyň 22-nji noýabryndaky “Pedagogik işgärleriň usuly-amaly okuwlaryny we maslahatlaryny geçirmek hakynda” 391 belgili buýrugyna laýyklykda Lebap welaýatynda 2026-njy ýylyň 8-nji ýawarynda etrap, şäher maslahatlary “Beýik işler bilime daýanýar, bilim bolsa terbiýe bilen geçmeli gymmatlykdyr” diýen şygar bilen geçirildi.Pederlerimiziň bilim we juda gymmatlyk hasaplan nesil terbiýesi barada Gahryman Arkadagymyzyň “Ömrümiň manysy” atly kitabynda nesil terbiýesiniň, mukaddes ýörelgeleriň ulularyň göreldesi bilen ýaş nesillere geçişi, şeýle-de mekdebe çenli çagalar edaralarynda çagalary hünäre ugrukdyrmagyň zerurlygy barada beýan edilýär.

    Berkarar döwletiň täze eýýamynyň Galkynyşy döwründe Gahryman Arkadagymyzyň, Arkadagly Garyman Serdarymyzyň baştutanlygynda ýurdumyzda bilim ulgamynda uly ösüşler gazanyldy. Hormatly Prezidetimiziň karary bilen tassyklanan “Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyndan” gelip çykýan wezipeler çagalar bagynyň işine ornaşdyrylýar. Bäş ýaşly çagalary mekdebe taýýarlamak, olara döwrebap bilim, terbiýe bermek mekdebe çenli çagalar edaralarynyň bilim işgärleriniň öňünde möhüm wezipe bolup durýar. Pedagogik işgärleriniň bilim işinde okatmagyň täze tejribelerinden, sanly tehnologiýalaryndan peýdalanmaklygy okuw maksatnamalarynyň mazmunyny doly özleşdirmeklerini gazanmaklyga we olary milli ruhda terbiýelemeklige ýardam edýär.

   Pedagogik işgärleriň Türkmenabat şäher maslahatynda Lebap welaýatynyň Saglygy dikeldiş okuw terbiýeçilik toplumynyň mekdebe çenli bölüminiň müdiri Abadan Ysmaýylowa “Saglyk ýagdaýy sebäpli mümkinçiligi çäkli çagalar bilen işlemegiň aýratynlygyny nazara alyp, pedagogik işgärleriň işini döwrebap guramagyň usullary”, Türkmenabat şäheriniň 65-nji çagalar bakja-bagynyň terbiýeçisi Şerbetaý Taganowanyň “Mekdebe çenli çagalar edaralarynyň okuw terbiýeçilik işlerine dünýäniň öňde baryjy iş tejribesini ornaşdyrmagyň ylmyň we tehnikanyň iň täze gazananlaryna esaslanyp, okuw sapaklaryny guramagyň çaganyň irki ösüşini hem-de olaryň mekdebe taýýarlygyny üpjün etmegiň ýollary” atly temada çykyşlary täsirli boldy. Çykyşlarda mekdebe çenli çagalar edaralarynyň pedagogik işgärleriniň hünär bilimlerini kämilleşdirmek maksady bilen, çagalaryň irki ýaşdan başlap beden we akyl taýdan sazlaşykly ösüşini, mekdebe taýýarlygyny üpjün etmekde ata-enelere berilýän maslahatlar barada öňdebaryjy iş tejribeden wideorolikler, pursatlar görkezildi. 

 Pedagogik işgärleriň etrap we şäher maslahatlarynda 2025-2026-njy okuw ýylynyň birinji ýarymynda mekdebe çenli çagalar edaralarynda okuw-terbiýeçilik, usuly işleriň alnyp barlyşy, hem-de 2025-2026-njy okuw ýylynyň ikinji ýarymynda öňde durýan wezipeler barada seljerme ýolbaşçylaryň çykyşlary hem diňlenildi. Bize ýaşamaga, döwrebäp işlemäge giň mümkinçilikleri döredip berýän Gahryman Arkadagymyzyň, Arkadagly Gahryman Serdarymyzyň janlary sag ömürleri uzak bolsun, beýik tutumly işleri rowaç alsyn!

Lebap welaýat Baş bilim müdirliginiň mekdebe

çenli bilim, terbiýe we mekdepden daşary edaralar

bölüminiň müdiri G.Jumaýewa