Koreýa Respublikasynyň Kangwon milli uniwersitetinde geçirilýän Merkezi Aziýa ýokary bilim hyzmatdaşlygy boýunça hünär okuw maksatnamasy

Döwletmämmet Azady adyndaky Türkmen milli dünýä dilleri institutynyň koreý dili mugallymy G.Saparowa «Döwletmämmet Azady adyndaky Türkmen milli dünýä dilleri instituty bilen Kangwon milli uniwersitetiniň arasynda ylym we bilim babatda hyzmatdaşlyk etmek barada özara düşünişmek hakynda Ähtnamanyň» çäginde 2026-njy ýylyň 7-15-nji ýanwary aralygynda Koreýa Respublikasynyň Kangwon milli uniwersitetinde geçirilýän Merkezi Aziýa ýokary bilim hyzmatdaşlygy boýunça hünär okuw maksatnamasyna gatnaşýar.

Bu bilim maksatnamasy daşary ýurtly talyplary çekmek, goldamak we hyzmatdaşlyk etmek boýunça tejribeleri paýlaşmak, şeýle hem Merkezi Aziýa ýurtlaryndan gelen talyplaryň arasynda hyzmatdaşlygy ösdürmek maksady bilen geçirilýär. Maksatnama umumy okuw, toparlaýyn bilim we medeni-öwreniş çärelerini öz içine alýar.

Hünär okuw maksatnamasynyň meýilnamasy koreý dilini okatmagyň hilini ýokarlandyrmaga hem-de koreý dili mugallymlarynyň hünär derejesini kämilleşdirmäge gönükdirilen çäreleri öz içine alýar. Maksatnamanyň çäginde koreý dilini daşary ýurtly talyplara okatmagyň häzirki zaman pedagogik usullaryny ornaşdyrmak, okatmagyň mazmunyny baýlaşdyrmak we mugallymlaryň tejribesini artdyrmak esasy ugur hökmünde kesgitlenilýär. Bu maksat bilen Kangwon milli uniwersitetiniň okuw-usuly materiallary esasynda koreý dilini okatmagyň netijeli usullary öwreniler we tejribede ulanylar.

Şeýle-de koreý halk ertekileriniň, medeni mirasynyň we okuw materiallarynyň üsti bilen dil öwretmegiň usullaryna aýratyn üns berilýär. Bu çemeleşme okuwçylaryň dil başarnyklary bilen birlikde, olaryň medeni düşünjesini ösdürmäge hem mümkinçilik berýär.

Mundan başga-da, maksatnamanyň çäginde koreý dili boýunça halkara derejeli TOPIK synagyna taýýarlyk görmek maksady bilen mugallymlar üçin usuly-amaly okuwlar guralar. Bu okuwlar synag talaplaryny çuňňur öwrenmäge, talyplary synaga taýýarlamagyň netijeli strategiýalaryny işläp taýýarlamaga hem-de bahalandyrma ulgamyny kämilleşdirmäge gönükdiriler.

Umuman alanyňda, meýilleşdirilýän çäreler koreý dilini okatmagyň usulyýetini ösdürmäge, mugallymlaryň hünär mümkinçiliklerini giňeltmäge we halkara bilim hyzmatdaşlygynyň çäklerinde dil biliminiň hil derejesini ýokarlandyrmaga gönükdirilip, gatnaşyjylar üçin uly ähmiýete eýe bolar.

Goý, «Garaşsyz, baky Bitarap Türkmenistan — bedew batly at-myradyň mekany» ýylynda eziz Diýarymyzy ösüşleriň ýurduna, kämil bilimleriň mekanyna öwürýän Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun, dünýä ähmiýetli beýik işleri rowaçlyklara beslensin!

Döwletmämmet Azady adyndaky Türkmen milli dünýä dilleri instituty