“KITAP – YNSANYŇ KÖŇÜL NAGŞY” ATLY ÇÄRE GEÇIRILDI

Magtymguly adyndaky Türkmen döwlet uniwersitetiniň ylmy kitaphanasynyň işgärleriniň, taryh fakultetiniň mugallymlarynyň we talyplarynyň gatnaşmagynda Hormatly Prezidentimiziň Karary bilen tassyklanan “Türkmenistanyň kitaphana ulgamyny ösdürmegiň 2025-2029-njy ýyllar üçin Döwlet maksatnamasynyň” we ony durmuşa geçirmegiň Meýilnamasynyň 1 ýyllygy mynasybetli, şeýle-de, “Magtymguly adyndaky Türkmen döwlet uniwersitetinde 2026-njy – “Garaşsyz, baky Bitarap Türkmenistan – bedew batly at-myradyň mekany” ýylynyň 11-nji ýanwaryndan 11-nji fewraly aralygynda geçiriljek kitap okamagyň biraýlygy boýunça bäsleşigiň Düzgünnamasyna” laýyklykda, Türkmenistanyň Döwlet medeniýet merkeziniň Döwlet kitaphanasy bilen bilelikde “Kitap – ynsanyň köňül nagşy” atly çäre geçirildi.

Çärede Magtymguly adyndaky Türkmen döwlet uniwersitetiniň ylmy kitaphanasynyň işgärleri, mugallymlary we talyplary Berkarar döwletiň täze eýýamynyň Galkynyşy döwründe türkmen halkynyň Milli Lideri Gahryman Arkadagymyzyň we Hormatly Prezidentimiz Arkadagly Gahryman Serdarymyzyň taýsyz tagallalary netijesinde bilim-ylym ulgamynyň yzygiderli kämilleşdirilmegi, ýaşlar syýasatynyň dabaralandyrylmagy we kitaphana işiniň täze taryhy döwrüň talaplaryna laýyklykda ýola goýulmagy barada buýsançly gürrüň etdiler.

Mugallymlar we talyplar Gahryman Arkadagymyzyň we Arkadagly Gahryman Serdarymyzyň kitaplarynyň gymmaty, türkmen we daşary ýurt alymlarynyň, ýazyjy-şahyrlarynyň kitaplary barada gymmatly maglumatlary aýdyp berdiler, olarda halkymyzyň şöhratly taryhy, merdana we beýik şahsyýetleri hem-de milli mirasy, şonuň ýaly-da, durmuşy we ylmy gymmatlyklaryň beýan edilýändigini belläp geçdiler.

Bu çärä gatnaşyjy talyplar Türkmenistanyň Döwlet medeniýet merkeziniň Döwlet kitaphanasynyň kitaphana hazynasynda saklanylýan kitaplar bilen ýakyndan tanşyp, kitabyň ynsan durmuşyndaky orny barada giňişleýin maglumatlara eýe boldular. Hususan-da, kitabyň ynsany aň-paýhas kämilligine eýe etmekdäki, zehin başarnyklaryny açmakdaky, döwürleriň gymmatyna göz ýetirmekdäki we saýlap alan hünäriň hakyky eýesi bolmakdaky ähmiýeti barada durup geçdiler. Çäräniň dowamynda oňa gatnaşyjy talyplar mugallymlara, uniwersitetiň ylmy kitaphanasynyň we Türkmenistanyň Döwlet medeniýet merkeziniň Döwlet kitaphanasynyň işgärlerine kitap, kitaphana işi hem-de olaryň gymmaty bilen baglanyşykly özlerini gyzyklandyrýan sowallary berdiler we kanagatlandyryjy jogaplary aldylar.

Çärä gatnaşyjy kitaphana işgärleri, mugallymlar we talyplar ýurdumyzda bilimi we ylmy ösdürmek, kitaphana işini yzygiderli kämilleşdirmek, kitaplary okamak, öwrenmek, ýaşlar syýasatyny giňden dabaralandyrmak babatda alyp barýan tutumly işleri üçin türkmen halkynyň Milli Lideri Gahryman Arkadagymyza we Hormatly Prezidentimiz Arkadagly Gahryman Serdarymyza hoşallyklaryny, tüýs ýürekden çykýan alkyş sözlerini beýan etdiler. 

Bossan GELDIMYRADOWA, Magtymguly adyndaky Türkmen

döwlet uniwersitetiniň ylmy kitaphanasynyň usulçysy,

Bahar KÖSSEKOWA, Magtymguly adyndaky Türkmen

 döwlet uniwersitetiniň ylmy kitaphanasynyň müdiri.