Watan goragçylarynyň güni mynasybetli ylmy-amaly maslahat geçirildi

Türkmen döwlet binagärlik-gurluşyk institutynda “Garaşsyz, baky Bitarap Türkmenistan – bedew batly at-myradyň mekany ýylynyň” ilkinji günlerinde ýurdumyzda giňden bellenilýän “Watan goragçylarynyň güni” mynasybetli «Gulluk edýäris jandan eziz Diýara, Gahryman Arkadaga, Arkadagly Serdara!» atly ylmy-amaly maslahat, talyp ýaşlaryň täze ylmy taslamalarynyň sergisi hem-de aýdym-sazly çykyşlar ýaýbaňlandyryldy.

Dabaraly maslahatyň dowamynda Hormatly Prezidentimiziň Milli Ýaragly Güýçlerimiziň maddy-tehniki binýadyny kämilleşdirmek, ýokary bilimli harby hünärmenleri taýýarlamak, Watan goragçylar hakynda döwlet tarapyndan edilýän aladalar, harby ylym we bilim ulgamlarynda gazanylýan üstünlikler dogrusynda gyzykly we täsirli çykyşlar edildi. Şeýle hem Watan goragçylarynyň güni mynasybetli ylymda, bilimde we okuw-terbiýeçilik işlerinde has tapawutlanan serkerde-mugallymlara we harby talyplara gymmat bahaly sowgatlar we Hormat hatlary dabaraly ýagdaýda gowşuryldy. Sylaglara mynasyp bolan serkerde-mugallymlar hem-de harby talyplar şeýle mümkinçilikleri döredip berýän türkmen halkynyň milli Lideri Gahryman Arkadagymyza hem-de Hormatly Prezidentimiz Arkadagly Gahryman Serdarymyza ýürek buýsançlaryny beýan etdiler.

Talyp ýaşlaryň döreden ylmy-taslama işleriniň sergisi çärä gatnaşyjylarda uly täsir galdyrdy. Bu taslamalar talyp ýaşlaryň döwrebap derejede bilim alýandyklarynyň, innowasion tehnologiýalardan baş çykarýan döwrebap hünärmenler bolup ýetişýändikleriniň aýdyň subutnamasy boldy. Dabaranyň dowamynda Türkmen döwlet binagärlik-gurluşyk institutynyň «Bagtyýarlyk binasy» aýdym-saz toparynyň çykyşlary ýaňlandy. Ylmy-amaly maslahat soňra bölümçelerde dowam etdi. Bu dabara Hormatly Belent Serkerdebaşymyzyň parasatly ýolbaşçylygynda üstünlikli amala aşyrylýan harby özgertmeler, Watan goragçylarynda ruhy-ahlak gymmatlyklaryny, sagdyn durmuş ýörelgelerini kemala getirmekde hem-de olaryň arasynda watansöýüjiligi wagyz etmekde giň gerimli işleriň durmuşa geçirilýändigi äşgär etdi.

Türkmen döwlet-binagärlik-gurluşyk institutynyň Ylym bölümi