Türkmenistanyň Oguz han adyndaky Inžener-tehnologiýalar uniwersitetinde bu ýokary okuw mekdebiň Aziýa uniwersitetleriniň arasynda iň gowy sekizlige saýlanmagy mynasybetli dabaraly maslahat geçirildi

Berkarar döwletiň täze eýýamynyň Galkynyşy döwründe ýurdumuzyň ylmy ösüşi dünýä derejesinde belent dabaralanýar. Şu gün Türkmenistanyň Oguz han adyndaky Inžener-tehnologiýalar uniwersitetinde bu ýokary okuw mekdebiniň Aziýa uniwersitetleriniň arasynda iň gowy sekizlige saýlanmagyna bagyşlanan dabaraly maslahat geçirildi.

Hormatly Prezidentimiziň ýolbaşçylygynda ýurdumyzda ylym we bilim ulgamyny düýpli döwrebaplaşdyrmak, ýurdumyzyň ýokary okuw mekdeplerini dünýäniň abraýly uniwersitetleriniň sanawyna goşulmagyny üpjün etmek ugrunda durmuşa geçirilýän özgertmeler özüniň ajaýyp miwelerini berýär.

​        Dünýäniň ýokary okuw mekdeplerini bahalandyrýan THE Times Higher Education guramasynyň resmi saýtynyň (theawardsasia.com) habar bermegine görä Türkmenistanyň Oguz han adyndaky Inžener-tehnologiýalar uniwersiteti Aziýanyň iň abraýly halkara baýraklarynyň biri bolan, dünýäde bilimiň Oskary hökmünde tanalýan “THE Awards Asia 2026” bäsleşiginiň gysga sanawyna, ýagny iň gowy uniwersitetleriň 8-ligine “Ýylyň STEM ylmy-taslamasy” (STEM Research Project of the Year) ugry boýunça saýlandy. ​ UniRank-2026 maglumatlaryna görä, Aziýada 6300-den gowrak ýokary okuw mekdebi bar. Aziýanyň uniwersitetleri tarapyndan 500-den gowrak işiň gatnaşmagynda geçirilen bu bäsleşikde, 10 sany ugur boýunça iş alyp baran diňe iň gowy 8 sany uniwersitetleriň "gysga sanawy" (shortlist) yglan edildi. 

Bu sanawda ýurdumyz bilen bir hatarda Ýaponiýa, Singapur, Günorta Koreýa, Taýland, Malaýziýa, Türkiýe, Hindistan we Gonkong ýaly ylmy-tehnologik taýdan ösen döwletleriň iň gowy ýokary okuw mekdepleri bar.

​        Bellemeli zatlaryň biri-de, Türkmenistanyň Oguz han adyndaky Inžener-tehnologiýalar uniwersiteti bu uly sepgide eýýäm ikinji gezek ýetmegi başardy. Uniwersitet 2024-nji ýylda hem Merkezi Aziýada ilkinji bolup bu sanawa girdi. 2026-njy ýyldaky bu täze üstünlik bolsa, Türkmenistanda ylmyň durnukly ösüşiniň nobatdaky subutnamasy bolup durýar. Uniwersitetiň ýaş alymlary tarapyndan taýýarlanan “Howply galyndylary ýokary arassalykdaky gipse öwürmek: durnukly materiallary öwrenmek ylmynda täze öwrülişik” atly ylmy işi dünýäniň bilermenleriniň ünsüni özüne çekdi.

​Şu günki geçirilen dabaraly maslahata uniwersitetiň professor-mugallymlary, ýaş alymlary we halkara ýaryşlarynyň ýeňijileri bolan talyplar gatnaşdylar. Maslahatyň başynda sanly ulgam arkaly Malaýziýanyň Ýaş alymlar guramasynyň (MYSO) prezidenti Razmi bin Abdul Razak gutlag sözi bilen çykyş etdi. Ol öz çykyşynda türkmen talyplarynyň dünýä derejesindäki ylmy mümkinçiliklerine ýokary baha berip, uniwersiteti gazanan bu uly üstünligi bilen gutlady hem-de geljekki hyzmatdaşlygyň täze mümkinçilikleri barada belläp geçdi.

Soňra sanly ulgam arkaly Ýaponiýanyň Nanomedisina we innowasiýa merkeziniň (iCONM) global hyzmatdaşlyk boýunça baş utgaşdyryjysy, doktorantura boýunça baş ylmy işgäriň orunbasary Sabina Kuaderiň “Nanomedisinada emeli aňyň ulanylyşy” atly temada çykyşy diňlenildi. Alym öz çykyşynda nanomedisinada emeli aň tehnologiýalaryny ulanmagyň mümkinçilikleri, şeýle hem bu ugurda Türkmenistanyň Oguz han adyndaky Inžener-tehnologiýalar uniwersiteti bilen hyzmatdaşlygyň geljekki ugurlary barada belläp geçdi.

​        Maslahatyň dowamynda halkara bäsleşige hödürlenen taslamanyň ýolbaşçysynyň çykyşy diňlenildi. Ol öz çykyşynda fosfogips galyndylaryny gaýtadan işläp, ýokary arassalykdaky gipsy almagyň täzeçil usullary we bu taslamanyň 2025-nji ýylda halkara bäsleşiklerde gazanan altyn medallary barada giňişleýin maglumat berdi.

​        Şeýle hem, ýygnananlaryň öňünde halkara ylmy taslama bäsleşiklerinde ýeňiji bolan talyplar we uniwersitetiň professor-mugallymlary çykyş etdiler. Olar öz çykyşlarynda ýurdumyzda ýaşlaryň dünýä derejesinde ylym bilen meşgullanmaklary üçin döredilýän döwrebap şertler, sanly tehnologiýalar bilen enjamlaşdyrylan barlaghanalar we gazanylýan halkara tejribeler barada buýsanç bilen bellediler.

​           ​ Türkmenistanyň Oguz han adyndaky Inžener-tehnologiýalar uniwersitetiniň bu gazanan üstünligi Türkmenistanyň ýokary okuw mekdepleriniň dünýäniň ylym we tehnologiýa giňişliginde mynasyp orun eýeleýändigini ýene bir gezek dünýä jemgyýetçiligine äşgär etdi.

Maslahatyň ahyrynda oňa gatnaşyjylar şeýle döwrebap ylym-bilim şertlerini döredip berýän, ýurdumyzyň ylmy-tehnologik ösüşini has-da belende götermekde bimöçber aladalary edýän Gahryman Arkadagymyza we Hormatly Prezidentimize alkyş sözlerini aýtdylar.