WATAN – BAŞYMYZYŇ TÄJI

Aşgabat şäher Baş bilim müdirliginiň garamagyndaky umumybilim berýän orta mekdepleriň kitaphanalarynda «Garaşsyz, baky Bitarap Türkmenistan – bedew batly at-myradyň mekany» diýlip yglan edilen 2026-njy ýylyň dowamynda türkmen halkynyň Milli Lideri Gahryman Arkadagymyzyň ýaş nesillerde kitap okamaga söýgi döretmek baradaky beýik başlangyjy esasynda hem-de «Türkmenistanyň kitaphana ulgamyny ösdürmegiň 2025-2029-njy ýyllar üçin Döwlet maksatnamasyndan» gelip çykýan wezipeleri ýerine ýetirmek maksady bilen milli senenanamyzdaky baýramçylyklary mynasyp garşylamak hem-de wagyz-nesihat etmek boýunça meýilnamalaýyn işler guramaçylykly alnyp barylýar. Ýaşlary watançylyk, milli ýörelgelere ygrarlylyk ruhunda terbiýelemekde möhüm ähmiýeti bolan kitaplary wagyz etmek boýunça guralýan işleriň has täsirli we netijeli bolmagy üçin döredijilik işgärleri, ýazyjy-şahyrlar bilen döwrebap edebi çäreleriň geçirilmegi yzygiderli dowam edýär.

Watan goragçylarynyň güni mynasybetli Aşgabat şäheriniň 76-njy ýöriteleşdirilen orta mekdebiniň kitaphanasynda Bazar Amanow adyndaky şäher çagalar kitaphanasynyň işgärleri bilen bilelikde dabaraly çäre geçirildi. Türkmenistanyň Döwlet serhet gullugynyň kapitany Aknur Rozyýewa bu çärede eden çykyşynda Milli Liderimiz Gahryman Arkadagymyzyň we Hormatly Prezidentimiz Arkadagly Gahryman Serdarymyzyň asuda Watanymyzyň, ösüp gelýän ýaş neslimiziň bagtyýar geljegi üçin edýän taýsyz tagallalaryna jogap hökmünde kämil bilim alyp, edepli-terbiýeli watan gerçekleri bolup ýetişmeklerini arzuw etdi we sözüniň soňunda okuwçylary ýokary harby mekdeplerinde okamaga çagyrdy.

Mekdep okuwçylary Watanymyzy wasp edýän goşgular we aýdymlar bilen çykyş etdiler, şeýle-de şahyr, Türkmenistanyň Gahrymany Gözel Şagulyýewanyň «Bedew batly at-myradyň mekany» diýen goşgusyny kompozisiýa görnüşinde ýerine ýetirdiler. Harby lybasa beslenen ýokary synp okuwçylary Watan goragçylaryň gününe bagyşlap esgerleriň harby aýdymyny hem joşgunly aytdylar.

Mekdebiň kitaphanaçysy Şalar Öräýewanyň ýolbaşçylygynda taýýarlanan, gursaklary Watana bolan söýgüsi bilen püre-pür ýaşlaryň her bir çykyşy dabara gatnaşýan myhmanlara ýakymly, buýsançly duýgulary paýlamagy başardy.

Aşgabat şäheriniň daşary ýurt dillerini çuňlaşdyryp öwredýän ýöriteleşdirilen 74-nji «Bagtyýar nesiller» orta mekdebiniň kitaphanasynda hem bu şanly sene mynasybetli «Mertlik mekdebiniň gerçek ýigitleri» atly edebi agşam geçiridi. Bu edebi agşamda watançy şahyrymyz Seýitnazar Seýdiniň: - Watan üçin çykdym gyr at üstüne / Tä janym çykynça, dönmenem begler! – diýen setirleri, onuň döredijiligi batyrlygyň, merdi-merdanalygyň kämil nusgasy hökmünde teswirlendi.

Kowusnamanyň «Söweşmek hakynda» diýen babyndaky gerçeklik baradaky düşünjeleri hem giňişleýin beýan edildi. Pederlerimize mahsus şeýle nusgawy häsiýetler biziň neslimize ýol-ýörelgedir. Ýaş neslimiziň bu ýörelgäni baýdak edinip, watansöýüji gerçekler bolup ýetişmeginde Milli Liderimiz Gahryman Arkadagymyzyň hem-de Hormatly Prezidentimiz Arkadagly Gahryman Serdarymyzyň eserlerini, milli nusgawy edebiýatymyzy ýaşlaryň arasynda wagyz edip, olarda okamaga, öwrenmäge bolan yhlaslarynyň kämilleşmeginde mekdep kitaphanaçysy Laçyn Gurbangeldiýewanyň hem uly paýy bar.

Aşgabat şäheriniň 9-njy orta mekdebiniň okuwçylary hem bu baýramçylyk çäräsine uly taýýarlykly geldiler. Mekdebiň girelgesi we eýwany baýramçylyk ruhunda bezeldi. Diwarlyklarda okuwçylaryň parahat asmanymyza, merdana esgerlerimize bagyşlap çeken suratlary ýerleşdirildi. «Watan diýmek – Mukaddeslik, Goramak – Mertlik» atly çäräniň iň täsirli pursatlarynyň biri-de okuwçylaryň edebi-sazly, sahna çykyşlary boldy. Ýokary synp okuwçylary halkymyzyň taryhynda yz galdyran Togrul beg, Çagry beg, Alp Arslan, Jelaleddin Meňburun ýaly merdana pederlerimiziň edermenligini wasp edýän taryhy çykyşlary görkezdiler. Mekdep kitaphanasynyň gaznasyndaky taryhy eserleri ürç edip okan, öwrenen okuwçylaryň çykyşlary olaryň bu baýramçylyga ykjam taýýarlanyp gelendiklerini aýdyň subut etdi.

Bu geçirilen çäreler ýaşlarda harby gulluga bolan sarpany, halkymyza we topragymyza bolan wepalylygy kemala getirmekde uly mekdep boldy.

Biz Berkarar döwletiň täze eýýamynyň Galkynyşy döwründe mynasyp üstünlikleriň gazanylýan zamanynda ýaşaýandygymyza buýsanýarys. Şeýle ajaýyp zamanada ýaşamak, okamak, işlemek üçin ähli mümkinçilikleri döredip berýän Milli Liderimiz Gahryman Arkadagymyza we Hormatly Prezidentimiz Arkadagly Gahryman Serdarymyza çyn ýürekden alkyş aýdýarys.

Jumagül Çalyýewa,

 Aşgabat şäher Baş bilim müdirliginiň usulçysy.