ÝUNISEF çagalaryň hukuklaryny ilerletmek maksady bilen Türkmenistanda degişli maksatnamany işe girizdi

ÝUNISEF Türkmenistanyň Hökümeti bilen hyzmatdaşlykda 2026 – 2030-njy ýyllar üçin Türkmenistandaky ÝUNISEF-niň ýurt maksatnamasyny resmi taýdan işe girizdi. Bu maksatnama her bir çaganyň sagdyn ösmegini, bilim almagyny we goragly bolmagyny üpjün etmek babatda umumy ygrarlylygyň tassyklamasyny görkezýär.

Maksatnama çagalaryň abadançylygy üçin möhüm ähmiýete eýe bolup, ileri tutulýan ugurlar boýunça milli ösüşi çaltlandyrmaga gönükdirilendir. Olaryň hataryna çagalaryň sagdyn ösmegi, enäniň saglygyna aýratyn üns bermek bilen çagalaryň saglygy we iýmitlenmegi, täze doglan bäbegiň we çaganyň saglygyna ünsi güýçlendirmek; ähli çagalaryň bilim netijelerini gowulandyrmak maksady bilen inklýuziw we ýokary hilli bilim; zorlugyň öňüni almak, başga görnüşdäki ideg ulgamyny berkitmek hem-de çagalaryň doly gatnaşygyny goldamak bilen bagly çäreleri öz içine alýan çagalaryň goragy; deňsizlikleri aradan aýyrmak we esaslandyrylan çözgütleriň kabul edilmegini goldamak üçin durmuş syýasaty we maglumatlara esaslanýan çemeleşmeler; şeýle-de häzirki we geljekdäki howplardan çagalary goramak maksady bilen, howanyň üýtgemegine durnuklylyk we töwekgelçilikleri nazara alýan maksatnamalar girýär.

ÝUNISEF-niň 2021 – 2025-nji ýyllar üçin ýurt boýunça Maksatnamasynyň çagalaryň hukuklaryny ilerletmek we milli ulgamlary berkitmek babatyndaky esasy netijeleri enäniň we çaganyň saglygyny gowulandyrmagy öz içine alýar. Bu ugurda 5 müň lukmançylyk işgäriniň hünär derejesi ýokarlandyryldy, immunizasiýa derejesi bolsa yzygiderli 95 göterimden ýokary saklanyp, 14 möhüm sanjymy öz içine aldy. Şeýle-de iýmitlenmegi gowulandyrmak maksady bilen, her ýyl 120 tonna witamin-mineral goşundylary satyn almak arkaly bugdaý ununy demir we foliý turşusy bilen baýlaşdyrmak hem-de ene süýdi bilen iýmitlendirmegi goldamak boýunça işler alnyp baryldy.

Çeşme: Türkmenistandaky ÝUNISEF-niň web sahypasy