«KITAP — GEÇMIŞI WE GELJEGI BIRLEŞDIRÝÄN EDEBI MIRAS» ATLY ÇÄRE

Magtymguly adyndaky Türkmen döwlet uniwersitetinde «Kitap — geçmişi we geljegi birleşdirýän edebi miras» atly çäre geçirildi. Oňa uniwersitetiň professor-mugallymlary, ylmy kitaphanasynyň işgärleri we talyplary gatnaşdylar. Çäre Türkmenistanyň Prezidentiniň Karary bilen «Türkmenistanyň kitaphana ulgamyny ösdürmegiň 2025 — 2029-njy ýyllar üçin Döwlet maksatnamasynyň» tassyklanylmagynyň 1 ýyllygyna hem-de Magtymguly adyndaky Türkmen döwlet uniwersitetinde 11-nji ýanwar – 11-nji fewral aralygynda geçirilýän kitap okamagyň biraýlygyna bagyşlandy.

Çärede Magtymguly adyndaky Türkmen döwlet uniwersitetiniň professor-mugallymlary, kitaphana işgärleri we talyp ýaşlary halkymyzyň şöhratly taryhynda kitaba goýulýan hormat-sarpa, ylmyň-bilimiň jemgyýetdäki orny, bu ugurda alnyp barylýan ýaşlar syýasaty, ýaş nesliň giň dünýägaraýyşly bolmagynda kitabyň orny bilen baglanyşykly eden çykyşlary ylmy hem täsirli boldy. Çykyşlarda şöhratly taryhymyz, meşhur şahsyýetlerimiz we milli mirasymyz hem-de ýurdumyzyň parahatçylyk söýüjilikli daşary syýasaty, şeýle hem durmuş-ykdysady taýdan durnukly ösüşi beýan edilýän Milli Liderimiz Gahryman Arkadagymyzyň we Hormatly Prezidentimiz Arkadagly Gahryman Serdarymyzyň kitaplarynyň taryhy ähmiýeti barada durlup geçildi. Çärede Magtymguly adyndaky Türkmen döwlet uniwersitetiniň professor-mugallymlarynyň we talyplarynyň öz hünär ugurlary boýunça bilim öwrenmek bilen bir hatarda çeper eserleri okamaklygy — bilimiň we ylmyň hil derejesiniň has-da ýokarlanmagynda mynasyp orna eýe bolýandygy bellenilip geçildi.

Hususan-da, Milli Liderimiz Gahryman Arkadagymyzyň «Kitap ynsanyň köňül nagşydyr, ol durmuşy açyp görkezýän ajaýyp aýnadyr» diýip belleýşi ýaly, kitaby durmuş hemrasyna öwürmek häzirki zaman türkmen jemgyýetinde ýaş nesliň esasy maksatlarynyň biri bolup, bu ugurda Alym Arkadagymyz we Hormatly Prezidentimiz tarapyndan tagallalar edilýär, mümkinçilikler we şertler döredilýär.

Çäre bilen ugurdaş Magtymguly adyndaky Türkmen döwlet uniwersitetiniň geografiýa fakultetiniň eýwanynda Milli Liderimiz Gahryman Arkadagymyzyň we Hormatly Prezidentimiz Arkadagly Gahryman Serdarymyzyň kitaplarynyň, orta asyrlar, nusgawy we häzirki zaman türkmen edebiýatynyň görnükli wekilleriniň kitaplarynyň, ýygyndylaryň, uniwersitetiň professor-mugallymlarynyň okuw kitaplarynyň, gollanmalarynyň, monografiýalaryň, dürli ýygyndylaryň hem-de şöhratly taryhymyzy, beýik şahsyýetlerimizi, söz ussatlarymyzy, alymlarymyzy we täze taryhy döwürde ýurdumyzyň durmuş-ykdysady ösüşini beýan edýän talyplar tarapyndan taýýarlanylan taslamalaryň guralan sergisi oňa gatnaşyjylarda uly täsir galdyrdy.

Çäräniň ahyrynda oňa gatnaşyjylar Berkarar döwletiň täze eýýamynyň Galkynyşy döwründe ýurdumyzy ösüşiň täze belentliklerine tarap alyp barýan tutumly işleri üçin türkmen halkynyň Milli Lideri Gahryman Arkadagymyza hem-de Hormatly Prezidentimiz Arkadagly Gahryman Serdarymyza tüýs ýürekden çykýan hoşallyk we akyş sözlerini beýan etdiler.

Bossan Geldimyradowa, Magtymguly adyndaky Türkmen

döwlet uniwersitetiniň ylmy kitaphanasynyň usulçysy.