ASMANYMYZ PARAHAT, DÜNÝÄ DOLSUN OWAZA! BEDEW ATYŇ BADYNDA ÝOL UZASYN DOWAMA!

Aşgabat şäheriniň 82-nji orta mekdebinde 2026-njy ýylyň “Garaşsyz, baky Bitarap Türkmenistan – bedew batly at-myradyň mekany” ýyly diýlip yglan edilmegi mynasybetli hem-de Milli Liderimiz Gahryman Arkadagymyzyň jöwher paýhasyndan dörän “Atda wepa-da bar, sapa-da”, “Ahalteke bedewi – biziň buýsanjymyz we şöhratymyz”, “Ganatly bedewler” atly ajaýyp kitaplaryny ösüp gelýän ýaş neslimizi – ilhalar, zähmetsöýer, ata Watanymyza, ene topragymyza mynasyp ýaşlary watançylyk ruhunda terbiýelemek maksady bilen mekdep kitaphanasynda “Asmanymyz parahat, dünýä dolsun owaza! Bedew atyň badynda ýol uzasyn dowama!” atly çeper okaýyş geçirildi.

Çärä gatnaşyjylar, ilkinji nobatda, ýylymyzyň şygary we nyşanlary bilen ýakyndan tanyş boldular. Ýylyň nyşanynda gamyşgulak ahalteke bedewiniň şekiliniň, ýurdumyzyň bäş welaýatynyň haly gölleriniň hem-de Türkmenistanyň döwlet kartasynyň ýerleşdirilmeginde uly many bar. Ahalteke bedewiniň şekili ösüşiň, parahatçylygyň, tizligiň görkezijisidir. Bäş welaýatymyzyň haly gölleri halkymyzyň agzybirligini, jebisligini, mizemezligini şekillendirýär. Türkmenistanyň döwlet kartasy ýurdumyzyň dünýä gatnaşyklarynda öz mynasyp ornuny tapandygynyň, dünýä jemgyýetçiligini parahatçylyga, özara bähbitli, deňhukukly gatnaşyklara çagyrýandygynyň güwäsidir.

Okuwçylar tarapyndan ýerine ýetirilen, türkmen halkynyň “Arşda laçyna deň, ýerde – jerene” deňelýän bedew atlarymyzy wasp edýän goşgulary, rowaýatlarydyr hekaýalary çärä gatnaşyjylarda öz täsirini galdyrdy.

Gahryman Arkadagymyz “Gadamy batly bedew” atly kitabynda türkmeniň ahalteke bedewiniň gözelligi barada örän dürs we çeper belleýär. Ahalteke bedewleriniň syrly dünýäsi barada gymmatly maglumatlar Milli Liderimiz Gahryman Arkadagymyzyň türkmen halkyna peşgeş beren “Atda wepa-da bar, sapa-da”, “Ganatly bedewler” atly kitaplarynda hem giň orun alýar. Türkmen bedewiniň keşbi ähli döwürlerde hem heýkeltaraşlaryň, küýzegärleriň, senetkärleriň, suratkeşleriň, halyçylaryň, ýazyjy-şahyrlaryň ünsüni özüne çekip gelipdir. Ahalteke bedewine mahsus aýratynlyklar, megerem, başga atlarda ýok bolsa gerek. Şu nukdaýnazardan ugur alyp okuwçylaryň arasynda behişdi bedewlerimiziň suratyny çeper beýan etmek boýunça surat bäsleşigi hem geçirildi. Bu geçirilen çäre ýaş okyjylaryň özlerinde Watana bolan söýgini ösdürmeklerine, türkmene mahsus bolan edep-terbiýäniň iň gowy nusgalaryny kemala getirmeklerine, päk ahlakly, ilhalar ynsanlar bolup ýetişmeklerine uly itergi berer.

Milli Liderimiz Gahryman Arkadagymyzyň we Hormatly Prezidentimiz Arkadagly Gahryman Serdarymyzyň ýolbaşçylygynda agzybir halkymyz aprel aýynyň soňky ýekşenbesinde Türkmen bedewiniň milli baýramyny döwlet derejesinde uludan tutar. Çünki türkmeni bedewsiz asla göz öňüne getirip bolmaýar. Biz bedew ýylynda asuda, parahat ýurdumyzda hemişe agzybirligiň höküm sürmegini arzuw edýäris. Goý, ähli mümkinçilikleri döredip berýän türkmen halkynyň Milli Lideri Gahryman Arkadagymyzyň we Hormatly Prezidentimiz Arkadagly Gahryman Serdarymyzyň janlary sag, ömürleri uzak, belent başlary aman, işleri hemişe rowaç bolsun!

Gülşat Abaýewa,

Aşgabat şäheriniň 82-nji orta

mekdebiniň kitaphanaçysy.