Koreýa Respublikasy Türkmenistanyň ýokary okuw jaýyna döwrebap enjamlar toplumyny sowgat berdi

Türkmenistanyň Daşary işler ministrliginiň Halkara gatnaşyklary instituty Koreýa Respublikasyndan Resmi ösüşe kömek (ODA) maksatnamasynyň çäklerinde döwrebap enjamlar toplumyny kabul etdi.

3-nji fewralda geçen çärede türkmen tarapyna Türkmenistanyň Daşary işler ministrliginiň Halkara gatnaşyklary institutynyň rektory Gülşat Ýusupowa, koreý tarapyna bolsa Koreýa Respublikasynyň Türkmenistandaky ilçihanasynyň wagtlaýyn Ynanylan wekili Kim Jun Çol wekilçilik etdi.

Diplomatik ýokary okuw mekdebine 4K formatly kameralar, uly göwrümli LED diwar, mikrofon we radio ulgamlary we ýokary öndürijilikli noutbuklar sowgat berildi.

Türkmenistanyň Daşary işler ministrliginiň Halkara gatnaşyklary institutynyň rektory Gulşat Ýusupowa bu döwrebap tehnikanyň halkara žurnalistikasy fakultetiniň talyplarynyň hakyky halkara metbugat merkezlerine mümkin boldugyça golaý şertlerde tejribe toplap biljek okuw telestudiýasynyň enjamlarynyň üstüni ýetirjekdigini nygtady.

Resmi ösüşe ýardam bermek boýunça kiçi maksatnama Türkmenistanyň durmuş-ykdysady ösüşine ýardam edýän başlangyçlary tehniki enjamlar we maddy goldaw bilen üpjün etmäge gönükdirilendir.