ÇAGA HYÝALY – JADYLY GALAM

“Türkmenistanyň kitaphana ulgamyny ösdürmegiň 2025-2029-njy ýyllar üçin Döwlet maksatnamasynda” bellenilen ýerine ýetirilmeli çäreleriň Meýilnamasynyň durmuşa geçirilmegini üpjün etmek maksady bilen Türkmenistanyň Bazar Amanow adyndaky Döwlet çagalar kitaphanasy hem-de TürkmenistanyňTelewideniýe, radiogepleşikler we kinematografiýa baradaky döwlet komitetiniň “Mahabat” müdirligi tarapyndan “Garaşsyz, baky Bitarap Türkmenistan – bedew batly at-myradyň mekany» ýylynda mekdep okuwçylarynyň arasynda “Çaga hyýaly – jadyly galam” atly döredijilik bäsleşigi geçirildi.

“Garaşsyz, baky Bitarap Türkmenistan – bedew batly at-myradyň mekany” ýylynda ýaş nesilleri bilim almaga höweslendirmek, ýurdumyzyň jemgyýetçilik, medeni durmuşyna işjeň gatnaşmaklaryny gazanmak ugrunda alnyp barylýan işlere mekdep okuwçylaryny çekmek üçin höweslendirmeler ulgamyny ösdürmek hem-de dalaşgärleriň iň gowy başlangyçlaryny saýlap almak we halk köpçüligine ýetirmek, şeýle-de çagalaryň döredijilik ukyplaryny, başarnyklaryny, özboluşly çözgütlerini ýüze çykarmak maksady bilen guralan bu bäsleşigiň şertine laýyklykda “Garaşsyz, baky Bitarap Türkmenistan – bedew batly at-myradyň mekany” ýylynyň şygaryny açyp görkezýän hekaýalar kabul edildi.

Türkmenistanyň Telewideniýe, radiogepleşikler we kinematografiýa baradaky döwlet komitetiniň “Mahabat” müdirligi tarapyndan bäsleşige hödürlenen işler teleýaýlymda halk köpçüligine ýetirmek bilen ildeşlerimiziň SMS arkaly ses bermegi esasynda jemlenen netijä laýyklykda iň köp ses gazanan döredijilik işi ýeňiji hökmünde saýlandy.

Bäsleşigiň ýeňijisi bolan 3 sany dalaşgär mekdep okuwçylarymyzy Türkmenistanyň Bazar Amanow adyndaky çagalar kitaphanasy Hormat haty we höweslendiriji sowgatlar bilen sylaglady. Olara Awaza milli syýahatçylyk zolagynda ýerleşýän “Şowhun” myhmanhanasynda bir sany ýakyn hossary bilen bäş günlük dynç almak mümkinçiligi döredildi. Bu bäsleşikde I orna mynasyp bolan Mary welaýatynyň Oguzhan etrabyndaky 12-nji ýöriteleşdirilen orta mekdebiň okuwçysy Melike Jumaberdiýewa, II orna mynasyp bolan Aşgabat şäherindäki 55-nji orta mekdebiň 10-njy synp okuwçysy Aýjemal Aşyrowa, III orna mynasyp bolan Aşgabat şäheriniň 30-njy orta mekdebiniň 4-nji synp okuwçysy Alihan Kuwwatberdiýew dagylary mekdep ýolbaşçylary, mugallymlary we okuwçylary dabaralay gutladylar. Olara Hormat haty hem-de ýadygärlik sowgatlar gowşuryldy.

Dabaralara gatnaşyjylar tarapyndan ýaş nesillerimiziň döwrebap bilim alyp, ukyp-başarnyklarynyň has-da ösmegine giň mümkinçilikleri döredip berýän Milli Liderimiz Gahryman Arkadagymyza hem-de Hormatly Prezidentimiz Arkadagly Gahryman Serdarymyza alkyş sözleri beýan edildi.

Türkmenistanyň Bilim ministrliginiň

okuw kitaplaryny taýýarlamak we neşir işleri bölümi