Şu ýyl Türkmen döwlet binagärlik-gurluşyk institutynyň täze binalar toplumy ulanmaga berler

Şu ýyl ýurdumyzyň saglygy goraýyş, ylym-bilim ulgamlarynda hem iri binadyr desgalaryň birnäçesi açylyp ulanmaga berler. Olaryň hatarynda Türkmen döwlet binagärlik-gurluşyk institutynyň täze binalar toplumy hem bar.

Institutyň 5 müň orunlyk täze binalar toplumynyň düýbi, hormatly Prezidentimiziň degişli Kararyna laýyklykda, 2023-2024-nji okuw ýylynyň ilkinji gününde tutuldy. Aşgabat şäheriniň Görogly köçesiniň ugrunda «Ajaýyp-gurluşyk» hususy kärhanasy tarapyndan bina edilýän täze binalar toplumynda häzirki wagtda gurluşyk işleri has depginli alnyp barylýar.

Ýokary okuw mekdebiniň döwrebap binalary mukaddes Garaşsyzlygymyzyň şanly 35 ýyllyk baýramynyň öňüsyrasynda, täze okuw ýylynyň ilkinji günlerinde professor-mugallymlardyr talyplara ajaýyp sowgat bolar.

Belläp geçsek, Türkmen döwlet binagärlik-gurluşyk instituty 2012-nji ýylyň 25-nji maýynda Türkmenistanyň Prezidentiniň degişli Permanyna laýyklykda döredildi. Häzirki wagtda ýokary okuw mekdebinde 7 fakultet, 26 kafedra hereket edip, 3 müňden gowrak talyp bilim alýar. Institutda her ýyl 600-den gowrak hünärmen taýýarlanylýar.

Çeşme: turkmenmetbugat.gov.tm