Türkmenistanyň we Türkiýäniň ylym-bilim ulgamyndaky hyzmatdaşlygyny giňeltmek maslahatlaşyldy

Türkmenistanyň Stambul şäherindäki Baş konsuly Öwezgeldi Jumanazarow 24-nji fewralda Türkiýe Respublikasynyň Medipol uniwersitetiniň rektory Bahadyr Kürşat Güntürk bilen duşuşyk geçirdi.

Duşuşygyň maksady bilim ulgamyndaky hyzmatdaşlygy ösdürmäge, ikitaraplaýyn ylmy-akademiki we lukmançylyk ugurlarynda tejribe gatnaşyklaryny giňeltmäge gönükdirildi.

Taraplar ýokary bilim ulgamynda alnyp barylýan işler, halkara hyzmatdaşlyk mümkinçilikleri hem-de türkmen ýaşlarynyň Türkiýede bilim almagy bilen bagly meseleler boýunça pikir alyşdylar.

Rektor B.Güntürk bu ýokary okuw mekdebiniň häzirki wagtda halkara derejede giň hyzmatdaşlyk ulgamyna eýedigini, şol sanda daşary ýurtly talyplar üçin döredilýän mümkinçilikleriň yzygiderli artdyrylýandygyny belledi.

Duşuşykda türkmen talyplary üçin täze mümkinçilikleri döretmek, stipendial maksatnamalary giňeltmek, mugallymlaryň we talyplaryň alyş-çalyş taslamalaryny ýola goýmak hem-de bilelikdäki ylmy-barlag işlerini ösdürmek meseleleri ara alnyp maslahatlaşyldy.

Taraplar geljekde degişli şertnamalaryň baglaşylmagynyň hem-de hyzmatdaşlygyň anyk maksatnamalar arkaly dowam etdirilmeginiň möhümdigini bellediler.

Çeşme: "Türkmenistan: Altyn asyr" elektron gazeti