Uniwersitetiň talyplary 18-nji ýapon dili suhangöýlük bäsleşigine gatnaşdylar

Türkmenistanyň Oguz han adyndaky Inžener-tehnologiýalar uniwersiteti Ýaponiýanyň Türkmenistandaky Ilçihanasynyň guramagynda 28-nji fewralda geçirilen 18-nji ýapon dili suhangöýlük bäsleşigine gatnaşdy. Bäsleşik Döwletmämmet Azady adyndaky Türkmen milli dünýä dilleri institutynda geçirildi. Talyplar bäsleşige iki dereje (başlangyç ýapon dili we ýokary derejeli ýapon dili) boýunça gatnaşdylar. Başlangyç dereje ýapon dili tapgyry boýunça talyplara berlen ertekini ýatdan çeper beýan etmeklik tabşyryldy. Bu dereje boýunça Türkmenistanyň Oguz han adyndaky Inžener-tehnologiýalar uniwersitetiniň Dil öwreniş bölüminiň talyby Islimow Meýlis baýrakly II orna, Tölekowa Gülşat höweslendiriji baýraga mynasyp boldular.

Bäsleşigiň ýokary derejeli ýapon dili tapgyrynda talyplar erkin temadan ýazan düzmelerini ýatdan çeper beýan etmek, şeýle-de emin agzalar tarapyndan berlen soraglara dogry jogap bermek arkaly bahalandyryldylar. Bu tapgyrda Türkmenistanyň Oguz han adyndaky Inžener-tehnologiýalar uniwersitetiniň Biotehnologiýa taýýarlygynyň ugrunyň 2-nji ýyl talyby Sähedowa Ogulşeker baýrakly I orna, Filologiýa taýýarlygy ugrunyň 2-nji ýyl talyby Çaryýewa Jeren baýrakly III orna, şeýle hem Filologiýa taýýarlygy ugrunyň 2-nji ýyl talyby Babanazarowa Jumasoltan höweslendiriji baýraga mynasyp boldular. Bäsleşikde üstünlik gazanan talyplara ýapon kompaniýalary tarapyndan gymmat bahaly planşetdir smartfon sowgatlary gowşuryldy. Ýokary derejeli ýapon dili tapgyrynda I we II orna eýe bolan talyplar Merkezi Aziýa ýurtlarynyň arasynda geçiriljek ýapon dili suhangöýlük bäsleşigine gatnaşmaga hukuk gazandylar.