Türkmen oba hojalyk uniwersitetinde zenanlar sarpalandy

S.A.Nyýazow adyndaky Türkmen oba hojalyk uniwersitetinde 5-nji martda Halkara zenanlar güni mynasybetli aýdym-sazly baýramçylyk çäresi boldy. Dabaranyň dowamynda ýokary okuw mekdebiniň professor-mugallymlaryna hem-de talyp gyzlaryna hormatly Prezidentimiziň adyndan pul sowgatlary dabaraly ýagdaýda gowşuryldy.

Çykyş edenler halkara baýramyň milli senenamamyzda möhüm orun tutýandygyny belläp, zenanlaryň jemgyýetimiziň jebisleşmegindäki ornuny nygtadylar. Uniwersitetiň işine we abraýyna goşýan goşantlary üçin zähmet çekýän hem-de bilim alýan gelin-gyzlara aýratyn minnetdarlyk bildirildi.

Dabarada döwlet Baştutanymyzyň «Ýaşlar — Watanyň daýanjy» atly kitabyndan getirilýän gymmatly nesihatlara hem üns çekildi. Ýokary okuw mekdebiniň zenanlar guramasynyň, şol sanda dokma önümçiligi fakultetiniň «Dokmaçylar» gurnagynyň alyp barýan işleriniň ýaş nesli terbiýelemekde uly ähmiýete eýedigi bellenildi.

Baýramçylyk dabarasy sungat ussatlarynyň we talyp ýaşlaryň taýýarlan aýdym-sazly çykyşlary bilen dowam etdi. Çärede ene mähri, zenan gözelligi wasp edilip, halkymyzyň bagtyýar durmuşy üçin uly aladalar edýän Gahryman Arkadagymyzyň we Arkadagly Gahryman Serdarymyzyň adyna hoşallyk sözleri aýdyldy.

Çeşme: S.A.Nyýazow adyndaky Türkmen oba hojalyk uniwersiteti