«GELJEGIŇ HÜNÄRLERINIŇ ATLASY» NEŞIR EDILDI

Häzirki döwürde dünýä ýurtlarynda hünär bilimini döwrebap derejede ösdürmeklige uly ähmiýet berilýär. Munuň özi ýurduň durmuş-ykdysady ösüşine öz oňyn täsirini ýetirýär, şeýle hem işçi güýjüni täzeden döretmegiň çeşmesi bolup çykyş edýär. Şunuň bilen baglylykda, ýurdumyzda bilim ulgamyny innowasion esasda ösdürmek strategik ähmiýetli meseleleriň biri bolup, sanly maglumatlara daýanýan ykdysadyýetiň kemala gelýän häzirki şertlerinde bilim hyzmatlarynyň täze görnüşleriniň hödürlenmegi, ilkinji nobatda, ykdysady pudaklaryň işçi güýçleriniň hili babatynda barha artýan talaplaryny we isleglerini kanagatlandyrmaga mümkinçilik berýär.

Ýurdumyzyň häzirki ösüşi ykdysadyýetiň sanlylaşdyrylmagy bilen häsiýetlendirilýär. Sanly özgertmeler zähmet bazaryndaky gatnaşyklaryň diňe bir mazmunyna däl, eýsem, hiline hem öz oňyn täsirini ýetirýär. Zähmet bazaryny bu özgertmelere uýgunlaşdyrmak häzirki döwrüň wajyp meselesi hasap edilýär. Zähmet bazaryny häzirki zaman sanly özgertmelerine uýgunlaşdyrmak işiniň üstünlikli amala aşyrylmagy üçin döwletiň sanly eýýamyň ösüşi bilen aýakdaş gitmeginiň täsirli çärelerini işläp taýýarlamak möhüm bolup durýar. XXI asyrda zerur bolan başarnyklar we ylmy-tehniki ösüşde bolup geçýän özgerişliklere çalt jogap bermek ukyby işçi güýjüniň bäsdeşlik artykmaçlygyny emele getirýär.

Ýaňy-ýakynda Türkmenistanyň Bilim ministrligi tarapyndan taýýarlanan «Geljegiň hünärleriniň atlasy» atly gollanma Türkmen döwlet neşirýat gullugy tarapyndan neşir edildi. Bu atlas hormatly Prezidentimiziň 2025-nji ýylyň 17-nji oktýabrynda çykaran 1570-nji Karary bilen tassyklanan «Türkmenistanda ýokary hünär bilimini ösdürmegiň 2026 – 2052-nji ýyllar üçin Strategiýasyna» laýyklykda ýokary bilimli hünärmenleri taýýarlamak üçin gysga we orta möhletiň dowamynda giň mümkinçiliklere eýe boljak pudaklaryň we hünärleriň gözükdirijisi bolmak bilen, geljekde haýsy hünärleriň, pudaklaryň işjeň kemala geljekdigine, olarda haýsy täze tehnologiýalaryň, önümleriň, dolandyryş amalyýetleriniň dörejekdigine hem-de zähmet bazarynda haýsy hünärlere zerurlygyň boljakdygyna düşünmäge ýardam berer.

Türkmenistanyň Bilim ministrliginiň

Okuw kitaplaryny taýýarlamak we neşir işleri bölümi