UMUMYBILIM BERÝÄN MEKDEPLER ÜÇIN TÄZE OKUW KITABY NEŞIR EDILDI

Garaşsyzlyk türkmen taryhynda düýpli öwrülişik pursady­ bolmak bilen, ol ýurduň, halkyň hemmetaraplaýyn ösüşiniň uly mümkinçi­liklerini öz içine alýan kadaly, tebigy, içerki we daşarky ýagdaýy­dyr. Garaşsyzlyk türkmen halkynyň aň-düşünjesiniň ösüşine, hususy milli bähbitleri bütin adamzat bilen baglanyşykly düşün­mäge güýçli itergi berdi. Halka öz medeniýetini gaýtaryp bermek bilen birlikde, ol dünýä medeniýetine aralaşmaga ýol açdy, ter­biýe we bilim bermegiň, ylmyň, informatikanyň, ruhy hem beden taýdan sagdyn nesilleri kemala getirmegiň milli ulgamyny ornaş­dyrmaga esas döretdi.

Garaşsyzlyk zamany türkmen taryhynda aýratyn orna eýe­. Onuň her aýy, her ýyly ykbal kesgitleýji wakalardan doly. Türkmenistanyň şol wakalary öz içine alýan iň täze taryhyny okuwçylaryň bilmegi üçin döwlet derejesinde ähli tagallalar edilýär. Häzirki zaman dünýäsin­de her bir okuwçynyň nähili döwletde ýaşaýandygyny, ol döwletiň köp babatlarda beýleki döwletlerden tapawutlanýandygyny bilmek hökmanydyr. Watançylyk terbiýesiniň düýp özeni hem hut şundan ybaratdyr.

Ýaňy-ýakynda umumybilim berýän mekdepleriň XII synpy üçin «Türkmenistanyň taryhy» okuw kitaby (awtory: Ý.Orazgylyjow – A.: Türkmen döwlet neşirýat gullugy, 2026) neşir edildi. Okuw kitaby üç bölümden, on iki sany bapdan ybarat bolup, olarda okuw maksatnamasyna laýyklykda degişli möhüm maglumatlar beýan edilipdir.

“Türkmenistan döwletiniň döredilmegi. Düýpli durmuş-ykdysady özgertmeleriň başlanmagy (1991–2006 ý.)” atly I bölümde “Türkmenistan döwletiniň döredilmegi – halkyň taryhy ykbalynda düýpli öwrülişik”, “Jemgyýetçilik-syýasy durmuşyň özgerdilmegi”, “Türkmenistanda ykdysady özgertmeler”, “Jemgyýetiň durmuş taýdan ösüşi”, “Bilim, ylym, medeniýet we sungat”, “Türkmenistanyň daşary syýasaty” ýaly baplar, “Türkmenistan garaşsyz ösüşiň täze tapgyrynda. Özgertmeleriň çuňlaşmagy we bazar ykdysadyýetine geçilmegi (2007–2021 ý.)” atly II bölümde “Garaşsyz ösüşiň täze tapgyrynda jemgyýetçilik-syýasy durmuş”, “Ykdysadyýetde bazar gatnaşyklarynyň ornaşdyrylmagy”, “Halkyň durmuş hal-ýagdaýy”, “Medeniýetiň ösdürilmegi”, “Türkmenistanyň daşary syýasaty” ýaly baplar ýerleşdirilipdir. “Türkmenistan – berkarar döwlet. Täze maksatnamalaryň kabul edilmegi” atly III bölümde häzirki döwre degişli gymmatly maglumatlar öz beýanyny tapypdyr.

Altyn harplar bilen ýazylýan täze taryhymyz uly buýsançly duýgulary döredýär. Şeýle uly özgertmeleriň başynda duran türkmen halkynyň Milli Lideri Gahryman Arkadagymyza we Hormatly Prezidentimiz Arkadagly Gahryman Serdarymyza berk jan saglyk, uzak ömür arzuw edýäris.

Türkmenistanyň Bilim ministrliginiň

Okuw kitaplaryny taýýarlamak we neşir işleri bölümi