HALKARA YNSANPERWER YLYMLARY WE ÖSÜŞ UNIWERSITETINDE HALKARA BÄSLEŞIGE BADALGA BERILDI

Berkarar döwletiň täze eýýamynyň Galkynyşy döwründe Türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň parasatly baştutanlygynda beýik maksatlar hem uly umytlar bilen gadam basylan «Garaşsyz, baky Bitarap Türkmenistan – bedew batly at-myradyň mekany» ýyly turuwbaşdan halkara üstünliklere beslendi. Bu halkara üstünlikleriň birnäçesiniň bilim ulgamyndadygy bellenilmäge mynasyp. Hut şu gün – 24-nji martda hem Halkara ynsanperwer ylymlary we ösüş uniwersitetinde VI Açyk Halkara Matematika Olimpiadasynyň açylyş dabarasy boldy.

Uniwersitetiň girelgesinde myhmanlar duz-çörekli garşy alyndy. Bu ýerdäki sanly ulgamyň sansyz mümkinçiliklerini ýaýbaňlandyran sergi daşary ýurtlylaryň ünsüni özüne kökerdi. Uniwersitetiň eýwanyndaky ekranda bolsa, daşary ýurtly myhmanlar Türkmenistanyň taryhyny, Halkara ynsanperwer ylymlary we ösüş uniwersitetinde 2021-nji ýyldan bäri bäş ýyllap yzygiderli geçirilip gelinýän OMOUS, has takygy ýokary okuw mekdepleriň arasynda geçirilýän Açyk Halkara Matematika Olimpiadasynyň 5 ýylyň dowamynda görkezen netijeleri hakynda gysgaça wideorolige tomaşa etdiler. Bu olaryň ählisinde ýatdan çykmajak ýakymly täsir galdyrdy.

Myhmanlar Halkara ynsanperwer ylymlary we ösüş uniwersitetiniň Maslahatlar zalyna geldiler. Bu ýerde VI Açyk Halkara Matematika Olimpiadasynyň açylyş dabarasy mynasybetli aýdym-sazly çykyşlar ýerine ýetirildi. Halkara bäsleşige gatnaşýan her bir ýokary okuw mekdebi aýratnlykda tanyşdyryldy.

Açylyş dabarasyna bagyşlanan aýdym-sazly çykyşlardan soňra Halkara Olimpiadanyň ýekebara görnüşine badalga berildi. Ýaş matematikler zerur bolan ähli şertleri döredilen Halkara ynsanperwer ylymlary we ösüş uniwersitetiniň okuw otaglarynda matematikanyň çylşyrymly mysaldyr meselelerini ýekebara görnüşde hasaplamak boýunça güýç synanyşdylar.

Bu bäsleşik dünýäniň ençeme döwletleriniň, has takygy, Russiýa Federasiýasynyň, Özbegistan Respublikasynyň, Gresiýa Respublikasynyň, Eýran Yslam Respublikasynyň, Germaniýa Federatiw Respublikasynyň, Wengriýa Respublikasy, Niderlandlar Patyşalygynyň, Täjigistan Respublikasynyň, Birleşen Arab Emirlikleriniňbaýry ýokary okuw mekdepleriniň talyplaryny özünde jemledi. Maglumat hökmünde nygtap geçsek, daşary ýurtlardan jemi 200-den köp talyp, şeýle-de ýurdumyzyň ähli ýokary okuw mekdepleriniň talyplary gatnaşyjy hökmünde hasaba alyndy. Jemi 500-den gowrak sany gatnaşyjydan ybarat bolan VI Açyk Halkara Matematika Olimpiadasynda ýaş zehinler ýekebara we toparlaýyn görnüşinde bäsleşerler. Bäsleşik A we B dereje esasynda alnyp barylar. A topara matematika we informatika boýunça, B topara bolsa, islendik hünär boýunça bilim alýan talyplar gatnaşarlar.

Düzgünnama laýyklykda, bäsleşigiň emin agzalary ýurdumyzyň we bu bäsleşige gatnaşýan daşary ýurtlaryň ýokary okuw mekdepleriniň professor mugallymlaryndan ybarat bolar. Olimpiadanyň çäklerinde paýtagtymyza gelen myhmanlar üçin «Magtymguly Pyragy» medeni-seýilgäh toplumynyň, Türkmenistanyň Döwlet medeniýet merkeziniň Döwlet muzeýine, şeýle-de paýtagtymyzyň «Aşgabat», «Arkaç», «Berkarar», «Gülzemin» ýaly söwda we dynç alyş merkezlerine gezelençleri guramak göz öňüne tutulýar.

Bu halkara bäsleşikde daşary ýurtlylar, eýsem, diňe bir ýurdumyzyň bilim ulgamynda gazananlaryna göz ýetirmek bilen çäklenmän, halkymyzyň gadymy taryhyna, medeniýet we sungat dünýäsine sary syýahat ederler. Döwrebap dynç alyş merkezleri bolsa, ýurdumyzyň ýeten belent sepgitleri bolup, olaryň hakydasynda hemişelik orun tutar. Bularyň ählisi bolsa, Watanymyzyň halkara abraýyny, şeýle-de, eziz Diýarymyza dünýä derejesinde berilýän ünsi öňküsinden-de artdyrar. Bu özgertmeleriň özeninde bolsa, Gahryman Arkadagymyzyň, Arkadagly Gahryman Serdarymyzyň eziz Watanymyzyň adyny äleme aýan etjek ýaş hem zehinli halkara hünärmenleri kemala getirmek ugrundaky taýsyz tagallary bar.

Sülgün MYRATGELDIÝEWA,

Halkara ynsanperwer ylymlary we ösüş uniwersitetiniň Žurnalistika kafederasynyň mugallymy