Materiallaryň garşylygy boýunça V halkara olimpiadanyň ýeňijileri yglan edildi

Türkmen döwlet binagärlik-gurluşyk instituty Türkmenistanyň we daşary ýurtlaryň ýokary okuw mekdepleriniň talyplarynyň arasynda geçirilen materiallaryň garşylygy dersi boýunça V Açyk halkara internet-olimpiadanyň ýeňijilerini yglan etdi.

Bäsleşigiň netijeleri boýunça ýurdumyzyň ýokary okuw mekdepleriniň talyplary jemi 106 sany baýrakly orna mynasyp boldular. Olar Türkmen döwlet binagärlik-gurluşyk institutyna, Türkmenistanyň Inžener-tehniki we ulag kommunikasiýalary institutyna, Türkmenistanyň Döwlet energetika institutyna, S.A.Nyýazow adyndaky Türkmen oba hojalyk uniwersitetine, Ýagşygeldi Kakaýew adyndaky Halkara nebit we gaz uniwersitetine, Türkmen oba hojalyk institutyna we ýurdumyzyň beýleki ýokary okuw mekdeplerine mynasyp wekilçilik etdiler.

Daşary ýurtly gatnaşyjylaryň arasynda Hytaý Halk Respublikasynyň, Russiýanyň, Gazagystanyň, Özbegistanyň, Gyrgyzystanyň, Belarusyň, Rumyniýanyň, Malaýziýanyň, Awstraliýanyň we Ugandanyň ýokary okuw mekdeplerinden 165 sany ýeňiji hem-de baýrakly orunlaryň eýeleri kesgitlenildi. Olaryň arasynda bäsleşik meýdançasynda 101 sany baýrakly orny eýelän Hytaýdan gelen talyplar aýratyn tapawutlandylar.

Olimpiada 18-nji martda türkmen, iňlis we rus dillerinde şahsy bäsleşik görnüşinde uzak aralykdan geçirildi. Gatnaşyjylara 120 minutda 6 sany meseläni çözmek hödürlendi. Olimpiadanyň eminler toparynyň düzümine türkmen we daşary ýurt ýokary okuw mekdepleriniň professorlary hem-de mugallymlary girdi.

Şu ýyl olimpiada dünýäniň 15 ýurdundan, şol sanda Awstraliýadan, Germaniýadan, Rumyniýadan, ABŞ-dan, Malaýziýadan, Hytaýdan, Russiýadan, Belarusdan, Gazagystandan, Gyrgyzystandan, Azerbaýjandan, Özbegistandan, Türkiýeden, Ugandadan we Pakistandan 63 sany ýokary okuw mekdebinden 877 talyby birleşdirdi.

Bäsleşik meýdançasynda dürli hünärlerde we kurslarda okaýan talyplar çykyş edip, özleriniň ýokary derejeli taýýarlyklaryny görkezdiler. Mugallymlar we talyplar hünär tejribesini hem-de çylşyrymly inženerçilik meselelerini çözmegiň öňdebaryjy usullaryny alyşmaga mümkinçilik aldylar.

Iri çäräniň ahyrynda guramaçylar ähli gatnaşyjylara görkezen gyzyklanmalary we ýeňşe bolan erjelligi üçin hoşallyk bildirdiler. Institut halkara çäräni guramakda işjeň ýardam berendikleri üçin daşary ýurtly ýokary okuw mekdeplerinden bolan kärdeşlerine aýratyn sagbolsun aýtdy.

Olimpiada türkmen ýokary okuw mekdebi tarapyndan eýýäm bäş ýyl bäri yzygiderli we netijeli geçirilip, ýaşlaryň arasynda uly meşhurlyga eýe bolýar. Bu bäsleşik ýaş zehinleri goldamak, talyplary takyk ylymlary öwrenmäge höweslendirmek, dostlukly gatnaşyklary giňeltmek we berkitmek, medeniýetara gatnaşyklary ösdürmek, bilim hem-de tejribe alyşmak we dünýäniň akademik jemgyýetçiliginiň wekilleriniň arasynda berk gatnaşyklary ýola goýmak üçin täsirli meýdança bolup hyzmat edýär.

Anastasiýa Kasýanowa

Çeşmesi: Altyn asyr habarlary