BILIM BELENTLIGINE TARAP: iňlis dili boýunça IV olimpiadanyň ýeňijileri yglan edildi

Türkmenistanyň Bilim ministrliginiň goldaw bermeginde Döwletmämmet Azady adyndaky Türkmen milli dünýä dilleri instituty tarapyndan guralan iňlis dili boýunça IV olimpiadanyň jemleri jemlendi. Garaşsyz Watanymyza, mähriban halkymyza wepaly, giň dünýägaraýyşly hem-de ýiti zehinli ýaşlary ýüze çykarmak maksady bilen geçirilen bu bäsleşik, ýurdumyzyň umumybilim berýän orta mekdepleriniň XI-XII synp okuwçylarynyň arasynda bilim we döredijilik dabarasyna öwrüldi.

Bäsleşigiň ilkinji pursatlaryndan başlap, tutuş ýurdumyz boýunça 3000-den gowrak zehinli okuwçy öz ukyplaryny synamak üçin hasaba alyndy. Olimpiadanyň ilkinji tapgyrynda gatnaşyjylar sanly ulgam arkaly «Öwrenmekden herekete» diýen çuň manyly tema boýunça iňlis dilinde özbaşdak esse ýazyp, özleriniň döredijilikli pikirleniş ukyplaryny we ýazuw endiklerini açyp görkezdiler. Bu tapgyrda iňlis edebi diliniň kadalaryna laýyk gelýän, mazmuny boýunça baý we täsirli işler Guramaçylyk topary tarapyndan içgin seljerildi.

Olimpiadanyň halkara derejesini we abraýyny has-da ýokarlandyrmak maksady bilen, Guramaçylyk toparynyň düzümine we emin agzalarynyň hataryna Özbegistan Respublikasynyň Özbek döwlet dünýä dilleri uniwersitetiniň tejribeli hünärmenleri – Iňlis diliniň amaly meselelerini öwreniş kafedrasynyň müdiri, dosent Şahodat Usmonowa hem-de şol kafedranyň mugallymy Bahadir Babanow girizildi. Bäsleşigiň soraglary we test ýumuşlary iki ýurduň ýokary okuw mekdepleriniň hünärmenleriniň gatnaşmagynda bilelikde taýýarlanyldy. Bu öz gezeginde bäsleşigiň obýektiwligini we halkara standartlaryna laýyk gelmegini üpjün etdi.

Olimpiadanyň 2026-njy ýylyň 28-nji martynda geçirilen ikinji tapgyry gatnaşyjylar üçin hakyky synag meýdançasyna öwrüldi. Birinji tapgyrda ýokary ukyp-başarnygyny görkezen 25 sany okuwçy institutyň Sanly bilim portalynda özleriniň iňlis dili boýunça okaýyşa, diňlemä we grammatika degişli bolan 10 sany çylşyrymly ýumuşlaryny ýerine ýetirdiler. Berlen 90 minut wagtyň dowamynda okuwçylar diňe bir nazary bilimlerini däl, eýsem dili amaly taýdan ulanmak ukyplaryny hem açyp görkezdiler. Her bir gatnaşyja testi geçmek üçin diňe bir mümkinçiligiň berilmegi we netijeleriň awtomatik usulda hasaplanmagy bäsleşigiň aýdyňlygyny hem-de adalatlylygyny üpjün etdi.

Iki tapgyryň umumy netijeleri boýunça Balkan welaýatynyň Balkanabat şäheriniň ýöriteleşdirilen 22-nji orta mekdebiniň 12-nji synp okuwçysy Gülaýym Garryjaýewa 1-nji orna, Daşoguz welaýatynyň Daşoguz şäheriniň 10-njy orta mekdebiniň 12-nji synp okuwçylary Gülgunça Ruslanowa hem-de Kamilla Ýusupowa  2-nji orna, Daşoguz welaýatynyň Daşoguz şäheriniň ýöriteleşdirilen 26-njy orta mekdebiniň 12-nji synp okuwçysy Nurmuhammed Iskenderow, şol şäheriň ýöriteleşdirilen 24-nji orta mekdebiniň 11-nji synp okuwçysy Atamyrat Jumaýew hem-de Aşgabat şäheriniň ýöriteleşdirilen 86-njy orta mekdebiniň 11-nji synp okuwçysy Güljemal Annagylyjowa 3-nji orna mynasyp boldular. Ýeňijiler Döwletmämmet Azady adyndaky Türkmen milli dünýä dilleri institutynyň Diplomlary we ýadygärlik sowgatlary bilen dabaraly ýagdaýda sylaglandylar. Şeýle hem, zehinli ýaşlary kemala getirmäge we olaryň hünär saýlamagyna uly goşant goşan mugallymlara institutyň Hormat hatlary gowşuryldy. Bu bäsleşik ýaşlaryň ylym-bilime bolan höwesini has-da artdyryp, olary täze sepgitlere we geljekki üstünliklere ruhlandyrdy.