«Ýylyň mugallymy ― 2026» bäsleşiginiň Lebap welaýat tapgyry geçirildi

Türkmenabat şäherindäki ýöriteleşdirilen 41-nji orta mekdebiň binýadynda «Ýylyň mugallymy ― 2026» bäsleşiginiň Lebap welaýat tapgyry geçirildi. Oňa bäsleşigiň deslapky tapgyrlarynda ýeňiji bolan mugallymlar gatnaşdylar. 

Bäsleşigiň çäklerinde mugallymlaryň usulyýet we ylmy işleri seljerilip, olaryň hünär ussatlyklaryna, ukyp-başarnyklaryna baha berildi.

Netijede, Halaç etrabyndaky 4-nji orta mekdebiň iňlis dili mugallymy Annagözel Jumageldiýewa birinji orny eýeledi. Türkmenabat şäherindäki ýöriteleşdirilen 39-njy orta mekdebiň biologiýa mugallymy Aman Berdimyradow bilen Çärjew etrabyndaky 12-nji orta mekdebiň geografiýa mugallymy Enejan Ereşowa ikinji orna mynasyp boldular. Saýat etrabyndaky ýöriteleşdirilen 4-nji orta mekdebiň matematika mugallymy Aýsoltan Amanmedowa, Darganata etrabyndaky 1-nji orta mekdebiň iňlis dili mugallymy Dilşat Ýaraşowa, Dänew etrabyndaky ýöriteleşdirilen 19-njy orta mekdebiň rus dili mugallymy Tatýana Ýewdokimowa dagy bolsa üçünji orny eýelediler.

Bäsleşigiň ýeňijilerine welaýat Baş bilim müdirliginiň Hormat haty we Türkmenistanyň Kärdeşler arkalaşyklarynyň welaýat birleşmesiniň ýadygärlik sowgatlary gowşuryldy.

«Ýylyň mugallymy» bäsleşigi mugallymlary hünär taýdan kämilleşdirmek we olaryň öňdebaryjy iş tejribesini ýaýbaňlandyrmak maksady bilen, Türkmenistanyň Bilim ministrligi tarapyndan her ýyl geçirilýär.

Çeşme: "Türkmen gündogary" gazeti