Türkmen mekdeplerinde täzelenen “Howa gutujygy” ornaşdyrylýar

Aşgabatda BMG-niň Ösüş maksatnamasynyň “Howa gutujygy” atly giň gerimli sebit taslamasynyň jemleri jemlendi. Bu taslama durmuşa geçirilýän döwründen bäri ýerli başlangyçdan global bilim platformasyna öwrüldi. Jemleýji seminar Türkmenistanyň Bilim ministrligine milli ekologiýa ýagdaýlaryna uýgunlaşdyrylan täzelen interaktiw toplumynyň geçirilmegi bilen tapawutlandy.

BMG-niň Ösüş maksatnamasynyň Hemişelik wekili Narine Saakýan global kynçylyklara garşy göreşiň netijeliligi ýaşlaryň ekologiýa sowatlylygyna gönüden-göni baglydygyny belledi. Russiýa Federasiýasy tarapyndan maliýeleşdirilýän taslama mekdep okuwçylaryna diňe bir nazaryýeti däl-de, dünýäniň 17 dilinde elýeterli bolan interaktiw guralyny hödürleýär.

RF-iň Adatdan daşary we Doly ygtyýarly Ilçisi Iwan Wolynkin 2012-nji ýylda Russiýanyň hökümetiniň goldawy bilen işe girizilen “Howa gutujygy” Merkezi Aziýada ekologiýa medeniýetiniň kemala gelmeginiň iň täsirli gurallarynyň biri bolmagynda galýandygyny belledi.

2026-njy ýylyň wersiýasy – bu milli bilermenleriň düýpli işleriniň netijesidir. Okuw materiallaryna biodürlülik, suw serişdelerini dolandyrmak we çölleşmä garşy göreş boýunça Türkmenistana mahsus bolan maglumatlary girizildi. Tanyşdyrylyşyň dowamynda alymlar we mugallymlar “gutujygyň” mekdep maksatnamasyna nädip ornaşdyrylýandygyny görkezdiler. Gollanmanyň elektron we çap edilen formatlary mugallymlara çagalary taslama işine çekmek bilen, çylşyrymly ylmy maglumatlary daşky gurşawy goramak boýunça düşnükli görkezmelere öwürmäge mümkinçilik berýär. Toplumlaryň milli hyzmatdaşlara geçirilmegi indi bu tejribäniň ýurduň ähli bilim edaralaryna ýaýbaňlandyryljakdygyny alamatlandyrýar.

Çeşmesi: ORIENT