Türkmenistanyň ýaşlar wekiliýeti Hindistanda: medeniýetleriň we dostlugyň duşuşygy

Berkarar döwletiň täze eýýamynyň Galkynyşy döwründe Hormatly Prezidentimiziň baştutanlygynda ýurdumyzyň daşary syýasatynda dünýä döwletleri bilen dostlukly gatnaşyklary ösdürmäge, halkara hyzmatdaşlygyny pugtalandyrmaga we ýaşlar diplomatiýasyny giňeltmäge uly ähmiýet berilýär. Soňky ýyllarda ýurdumyzyň dünýäde ykdysady görkezijileri babatda öňdäki orunlara çykýan Hindistan bilen hyzmatdaşlygy hil taýdan täze derejä çykýar. Gadymyýetden gözbaş alýan dostluk, hoşniýetli goňşuçylyk we birek-birege goldaw bermek däplerine esaslanýan ikitaraplaýyn gatnaşyklar häzirki döwürde täze many-mazmun bilen baýlaşdyrylýar. Şunuň bilen baglylykda, 2026-njy ýylyň 24-nji martyndan 2-nji apreline çenli Hindistan Respublikasynda Merkezi Aziýa döwletleriniň wekilleriniň gatnaşmagynda “Tech, Entertainment and Culture” atly halkara tanyşlyk maksatnamasy geçirildi.

Türkmenistanyň dürli ulgamlarynda zähmet çekýän ýaş wekillerden ybarat wekiliýet bu halkara maksatnama, şol sanda Ýagşygeldi Kakaýew adyndaky Halkara nebit we gaz uniwersitetiniň mugallymy Enejan Babaýewa işjeň gatnaşdy. Maksatnamanyň esasy maksady ýaşlar wekiliýetleriniň nobatdaky tapgyrynyň çäklerinde halkara tejribe alyşmak, medeni gatnaşyklary ösdürmek hem-de dürli ýurtlaryň wekilleriniň arasynda hyzmatdaşlygy pugtalandyr makdan ybarat boldy. Saparyň dowamynda gatnaşyjylar Hindistanyň iri şäherleri bolan Mumbaý, Goa we New Deli şäherlerinde bolup, ýurduň ylmy, medeni, taryhy hem-de häzirki zaman ösüş ugurlary bilen giňişleýin tanyşdylar.

Mumbaý şäherinde dünýä derejesinde tanalýan ýokary okuw mekdepleriniň biri bolan Indian Institute of Technology Bombay institutyna guralan saparyň dowamynda häzirki zaman tehnologiýalary, ylmy barlag işleri, innowasion taslamalar hem-de ýaş alymlary goldamak boýunça alnyp barylýan işler barada giňişleýin maglumat alyndy. Şeýle hem maksatnamanyň çäklerinde gatnaşyjylar Mumbaý şäheriniň taryhy-medeni ýadygärliklerine baryp gördüler. Şolaryň arasynda Gateway of India, Elephanta Caves gowaklary hem-de Chhatrapati Shivaji Maharaj Museum aýratyn täsir galdyrdy. Gadymy hindi binagärliginiň nusgalary we baý medeni mirasy gatnaşyjylarda uly gyzyklanma döretdi.

Goa şäherindäki çäreleriň dowamynda taryhy-medeni ähmiýeti ýokary bolan Basilica of Bom Jesus we Sé Cathedral ýaly dünýä belli ýadygärliklere baryldy. Şeýle hem National Institute of Oceanography ylmy-barlag institutynda okeanografiýa, deňiz biologiýasy hem-de klimat boýunça alnyp barylýan ylmy işler bilen tanyşlyk geçirildi.

Saparyň soňky tapgyry New Delhi şäherinde dowam edip, gatnaşyjylar Hindistanyň ýaşlar syýasaty boýunça degişli edaralarynyň wekilleri bilen duşuşyklara gatnaşdylar. Şeýle-de paýtagtyň taryhy ýerleri bolan Red Fort, Qutub Minar, National Museum hem-de Raj Ghat bilen tanyşmak mümkin boldy. Hindistan Respublikasynda geçirilen bu halkara maksatnama dürli ýurtlaryň wekilleriniň arasynda dostlukly gatnaşyklary pugtalandyrmakda, tejribe alyşmakda hem-de halkara hyzmatdaşlygyny ösdürmekde möhüm ähmiýete eýe boldy.

Ýagşygeldi Kakaýew adyndaky Halkara nebit we gaz uniwersiteti