Ýagşygeldi Kakaýew adyndaky Halkara nebit we gaz uniwersitetiniň Ykdysadyýet we dolandyryş fakultetiniň Işgärleri dolandyrmak (nebitgaz pudagynda) taýýarlyk ugrunyň talyplary bilen Türkmenistanyň Zähmet we ilaty durmuş taýdan goramak ministrliginde göçme okuw sapagy geçirildi

Garaşsyzlyk ýyllarynda ýurdumyzyň ykdysadyýetinde gazanylýan üstünlikler we ösüşler ilatyň bagtyýar ýaşaýşyny üpjün etmegiň berk binýady bolup durýar. Milli ykdysadyýetimiziň her ýylda durnukly ösmegi, adam mümkinçiliklerini giňeltmäge gönükdirilýän maýa goýumlaryň möçberiniň barha artmagy, beýleki makroykdysady görkezijilerde gazanylýan ösüşler raýatlaryň durmuş goraglylygyny berkitmäge, ilatyň maddy-durmuş şertlerini gowulandyrmaga, hususan-da, olaryň girdejilerini yzygiderli artdyrmaga mümkinçilik berýär. Türkmenistanyň ykdysadyýeti ýokary depginler bilen ösýän, dünýäniň ykdysady giňişligine üstünlikli goşulyşýan ýurtlaryň hatarynda eýeleýän ornuny pugta berkitdi. Garaşsyz Watanymyzy mundan beýläk-de ösdürmek, täzeçil başlangyçlary öňe sürýän telekeçiligi höweslendirmek, öňdebaryjy tehnologiýalary ornaşdyrmak, bilelikdäki kärhanalary we paýdarlar jemgyýetlerini döretmek, ätiýaçlandyryşy, gazna biržasyny hem-de gymmatly kagyzlar bazaryny ösdürmek arkaly ähli pudaklarda düýpli özgertmeleri amala aşyrmak ykdysady strategiýasynyň ileri tutulýan ugurlary hökmünde kesgitlenildi.

Türkmenistanyň ykdysadyýetiniň köp pudaklarynyň deňagramly ösüşini, bäsdeşlige ukyplylygyny saklamaga mümkinçilik berdi. Infrastruktura özgertmelerini goldamak bilen, Durnukly ösüş maksatlaryna ýetmäge ugur alynmagy, Türkmenistanda 2022-2052-nji ýyllarda durmuş-ykdysady taýdan ösdürmegiň Milli maksatnamasyna laýyklykda, iň täze ýokary netijeli hem-de ekologiýa taýdan arassa tehnologiýalar we nou-haular esasynda işleýän ylmy önümçilikleri döretmek boýunça işler dowam eder. Nebitgaz ulgamynda birnäçe iri desgalary gurmak we döwrebaplaşdyrmak göz öňünde tutulýar. Türkmenistany ýakyn geljek üçin durmuş-ykdysady taýdan ösdürmek hem-de onuň möhüm düzüm bölegi bolan nebit-gaz senagatyny ösdürmek baradaky strategiýanyň durmuşa geçirilmegi Watanymyzyň ykdysady kuwwatyny has-da pugtalandyrmaga hyzmat eder. Häzirki döwürde Türkmenistanda elektroenergetika, nebit-gaz çykarýan, nebiti gaýtadan işleýän, himiýa we nebit-himiýa senagatlaryndan, maşyn-gurluşyk we demiri gaýtadan işleýän, gurluşyk materiallaryny öndürýän desgalar, ýeňil we azyk senagatynyň kärhanalary bilen üpjün edilen köp pudakly, dürli maksatly ykdysadyýet döredildi. Häzirki zaman şertlerinde nebit-gaz senagatyny ösdürmek baradaky strategiýanyň durmuşa geçirilmegi ýurdumyzyň ykdysady kuwwatyny has-da pugtalandyrmaga hyzmat eder.

Bu gün hem Ýagşygeldi Kakaýew adyndaky Halkara nebit we gaz uniwersitetiniň halypa mugallymlary we talyp ýaşlary bilen bilelikde Türkmenistanyň Zähmet we ilaty durmuş taýdan goramak ministrliginde okuw sapagy geçirildi. Bu geçirilen okuw sapagy Ýagşygeldi Kakaýew adyndaky Halkara nebit we gaz uniwersitetiniň ykdysadyýet we dolandyryş fakultetiniň talyplarynyň öz ugurlary bilen baglanşykly bolup talyplar üçin örän gyzykly boldy. Bu geçirilýän okuw sapagynda uniwersitetimiziň halypa mugallymlary bilen bilelikde Türkmenistanyň Zähmet we ilaty durmuş taýdan goramak ministrliginiň hünärmenleri hem talyp ýaşlarymyza öz iş ugurlaryna degişli bolan gyzykly maglumatlar bilen çykyş edip öz iş tejribelerini talyp ýaşlarymyz bilen paýlaşdy. Bu geçirilen göçme okuw sapagy talyplarymyzyň bilimini has-da kämilleşdirmekde örän uly itergi berdi.

Bu ajaýyp mümkinçilikleri bize döredip beren Gahryman Arkadagymyzyň we Arkadagly Gahryman Serdarymyzyň janlarynyň sag, başlary dik, ömürleri uzak bolmaklaryny, il-ýurt bähbitli alyp barýan tutumly işleriniň mundan beýläkde uly rowaçlyklara beslenmegini tüýs ýüregimizden arzuw edýäris.

Ýagşygeldi Kakaýew adyndaky Halkara nebit we gaz uniwersiteti