AŞGABAT ŞÄHERINDE MEKDEP OKUWÇYLARYNYŇ III HALKARA MATEMATIKA OLIMPIADASY ÖZ IŞINE BAŞLADY

2026-njy ýylyň 9-njy aprelinde Magtymguly adyndaky Türkmen döwlet uniwersitetinde Türkmenistanyň Bilim ministrliginiň guramagynda mekdep okuwçylarynyň III Halkara matematika olimpiadasynyň açylyş dabarasy geçirildi. Oňa Russiýa Federasiýasynyň, Özbegistan Respublikasynyň, Täjigistan Respublikasynyň, Gazagystan Respublikasynyň, Ermenistan Respublikasynyň, Belarus Respublikasynyň, Türkiýe Respublikasynyň, Hytaý Halk Respublikasynyň, Eýran Yslam Respublikasynyň, Gyrgyz Respublikasynyň, şeýle hem Türkmenistanyň umumybilim berýän orta mekdeplerinden okuwçylaryň jemi 198-si, şeýle hem açylyş dabarasyna takyk bilim ugry boýunça ýurdumyzyň ussat mugallymlary bilen bir hatarda, ady agzalan ýurtlardan gelen mugallymlaryň 28-si, şeýle-de köpçülikleýin habar beriş serişdeleriniň wekilleri, Türkmenistanyň Daşary işler ministrliginiň Halkara gatnaşyklary institutynyň, Нalkara ynsanperwer ylymlary we ösüş uniwersitetiniň, Magtymguly adyndaky Türkmen döwlet uniwersitetiniň žurnalistika hünärinde bilim alýan talyplaryndan we tejribeli mugallymlardan ybarat bolan habarçylar (media) toparynyň agzalary gatnaşdylar. 

Bu halkara olimpiada gatnaşýan daşary ýurtly wekiliýetler halkymyzyň myhmansöýerlik däplerine laýyklykda garşylanyldy. Watanymyzyň ýokary döredijilik ruhuny, parahatçylyk söýüjilik, hoşniýetlilik, dost-doganlyk ýörelgelerimizi wasp edýän aýdym-sazlar bolsa açylyş dabarasyna özboluşly baýramçylyk öwüşginini çaýdy. Dabarada türkmen dilinde hem-de bäsleşige gatnaşyjy döwletleriň dillerinde ýaňlanan aýdymlar sungatyň dilinde halklaryň arasynda dost-doganlygy, parahatçylygy berkitmäge çagyryşyň belent nusgasy bolup ýaňlandy. Magtymguly adyndaky Türkmen döwlet uniwersitetiniň binasynyň eýwanynda bilim ulgamynda ýetilen sepgitler, mekdep durmuşy we okuwçy ýaşlaryň üstünlikleri, taslama-döredijilik işleri, çagalar çeperçilik mekdepleriniň okuwçylarynyň çeken suratlary, kitaplar bilen tanyşdyrýan özboluşly sergi hem guraldy. Halkara ders olimpiadasynyň açylyş dabarasynda çykyş eden dostlukly ýurtlaryň wekilleri bildirilen myhmansöýerlik we meýilleşdirilen çäreleriň ýokary guramaçylyk derejesiniň üpjün edilendigi üçin türkmen tarapyna hoşallyk sözlerini aýtdylar.

Ders bäsleşigine gatnaşmak maksady bilen ýurdumyza gelen wekiliýetler üçin ýörite medeni maksatnama hem taýýarlanyldy. Şoňa görä-de, günüň ikinji ýarymynda olimpiada gatnaşyjy myhmanlar ak mermerli Aşgabadyň ajaýyp ýerlerinde, aýratyn hem, Bitaraplyk binasynda we Bitaraplyk muzeýinde bolup, wagtlaryny gyzykly geçirdiler. 

Şeýlelikde, mekdep okuwçylarynyň III Halkara matematika olimpiadasy 2026-njy ýylyň 13-nji apreline çenli öz işini dowam eder. 

Şamuhammet ELÝASOW,

Türkmenistanyň Daşary işler ministrliginiň

Halkara gatnaşyklary institutynyň

Halkara žurnalistikasy fakultetiniň II ýyl talyby.