Türkmenistanyň Bilim ministrliginiň wekiliýeti Birleşen Milletler Guramasynyň Ykdysady we Durmuş Geňeşiniň (ECOSOC) guramagynda Amerikanyň Birleşen Ştatlarynyň Nýu-Ýork şäherinde geçirilýän ýaşlar forumyna gatnaşýar

2026-njy ýylyň 14-nji aprelinde Türkmenistanyň Bilim ministrliginiň wekiliýeti Birleşen Milletler Guramasynyň Ykdysady we Durmuş Geňeşiniň (ECOSOC) guramagynda Amerikanyň Birleşen Ştatlarynyň Nýu-Ýork şäherinde geçirilýän Ýaşlar forumynyň açylyş dabarasynyň birinji gününe gatnaşýar. Forum “Innowasiýa, birleşmek we özgertmek: ýaşlaryň 2030-njy ýyla barýan ýoly kemala gelýär” atly şygar astynda geçirilip, durnukly ösüş boýunça 2030-njy ýyla çenli döwür üçin Gün tertibini ilerletmek maksady bilen ýaşlary, agza döwletleriň wekillerini, BMG-niň düzümlerini hem-de hyzmatdaş guramalary bir ýere jemleýär. Bu halkara foruma Türkmenistanyň Bilim ministrliginiň Halkara hyzmatdaşlyk bölüminiň müdiri Gülnabat Gurdowa we Ýaşlar syýasaty bölüminiň müdiri Wepa Gutlyýew wekilçilik edýärler.

Forumyň ilkinji güni “Ýaşlar bilen we ýaşlar üçin iş alyp barmak: 2030-njy ýylyň Gün tertibi üçin inklýuziw hem-de durnukly çözgütleri kemala getirmek” diýen mowzuga bagyşlanýar. Günüň maksatnamasy boýunça Howandarlyk geňeşiniň mejlisler zalynda açylyş dabarasy bilen başlandy. Ol BMG-niň Ykdysady we durmuş meseleleri boýunça departamenti (UNDESA), Çagalar we ýaşlar boýunça esasy topar (MGCY), Ýaşlar guramalarynyň halkara utgaşdyryjy mejlisi (ICMYO) hem-de Forumyň ýaşlar hyzmatdaşlary topary tarapyndan alnyp baryldy. Açylyş bölüminde Ykdysady we Durmuş Geňeşiniň 2026-njy ýylyň Ýaşlar forumyna bagyşlanan wideorolik görkezildi, şeýle hem BMG-niň Ykdysady we Durmuş Geňeşiniň Başlygy jenap Lok Bahadur Thapa, BMG-niň Baş Assambleýasynyň 80-nji sessiýasynyň Başlygy hanym Annalena Berbok, BMG-niň Baş sekretarynyň orunbasary hanym Amina Mohammed hem-de DMUN-yň ýerine ýetiriji direktory jenap Jaewon Choi çykyş etdiler.

Açylyş maksatnamasynyň möhüm bölegi hökmünde “Durnukly ösüş maksatlaryna ýetmekdäki ösüşi çaltlandyrmak üçin ýaşlaryň öňe sürýän innowasiýalary we çözgütleri” atly ara alyp maslahatlaşmalar geçirildi. Onuň dowamynda dünýäniň dürli ýurtlaryndan gelen ýaş liderler öz pikirlerini, tejribelerini we durnukly ösüşe gönükdirilen amaly başlangyçlaryny beýan etdiler. Şeýle-de duşuşykda ýaşlaryň Durnukly ösüş maksatlaryny amala aşyrmak boýunça toplumlaýyn teklipleriň işlenip taýýarlanylmagyna işjeň gatnaşmagynyň, öňdebaryjy tejribeleri alyşmagynyň we häzirki zaman ählumumy wezipelerine netijeli çemeleşmeleri ilerletmeginiň ähmiýeti aýratyn nygtaldy.

Soňra “Weekly Advice for Young Entrepreneurs (WAYE)” platformasynyň esaslandyryjysy hanym Sinead Bovell tarapyndan alnyp baryldy. Bu bölümde BMG-niň Ýaşlar edarasy boýunça ýolbaşçysy we ýaşlar meseleleri boýunça BMG-niň Baş sekretarynyň kömekçisi doktor Felipe Paullier, Bosgun ýaşlaryň ählumumy torunyň strategiýa we hyzmatdaşlyk boýunça utgaşdyryjysy Laura Valencia, gelip çykyşy we zähmet ýagdaýy boýunça kemsidilýän jemgyýetler boýunça ählumumy forumyň uly hukuk gözlegçisi Naveen Gautam, howany goramagyň adyl çemeleşmesi ugrunda çykyş edýän Laura Lock hem-de Parahatçylyk ugrunda ýaşlaryň we talyplaryň halkara birleşiginiň BMG-däki wekili Nagma Shrestha çykyş etdiler. Çykyşlarda ýaşlaryň ählumumy karar kabul ediş işlerine işjeň gatnaşmagynyň möhümdigi, şeýle hem olaryň durmuş goraglylygy, howa bilen bagly gün tertibi we inklýuziw ösüşiň çözgütleri babatynda goşýan goşantlarynyň ähmiýeti bellenildi.

Çäraniň maksatnamasyna laýyklykda, forumyň birinji gününde Durnukly ösüş maksady 6 — “Arassa suw we sanitariýa”, Durnukly ösüş maksady 7 — “Elýeterli we arassa energiýa” hem-de Durnukly ösüş maksady 9 — “Senagat, innowasiýa we infrastruktura” boýunça hem plenar mejlisler geçirilýär. Bu mejlisleriň dowamynda suw we sanitariýa hyzmatlaryna hemmeler üçin elýeterliligi üpjün etmek, ýaşlaryň durnukly energetika çözgütlerini ilerletmäge goşýan goşandy, şeýle hem innowasiýalaryň, sanly özgertmeleriň we telekeçiligiň durnukly ösüşi ilerletmekdäki orny ara alnyp maslahatlaşylýar.

Türkmenistanyň wekiliýetiniň Ykdysady we Durmuş Geňeşiniň Ýaşlar forumyna gatnaşmagy ýurdumyzyň ýaşlar syýasaty, bilim we durnukly ösüş ulgamlarynda halkara hyzmatdaşlygy ösdürmäge ygrarlydygyny nobatdaky gezek tassyklaýar. Forum ýaşlaryň jemgyýetçilik durmuşyndaky ornuny giňeltmek, olaryň häzirki döwrüň möhüm meseleleriniň çözgüdine goşýan goşandyny goldamak hem-de 2030-njy ýylyň Gün tertibiniň maksatlaryna laýyk gelýän netijeli garaýyşlary alyşmak üçin möhüm halkara meýdança bolup çykyş edýär.

Türkmenistanyň Bilim ministrligi