Ýagşygeldi Kakaýew adyndaky Halkara nebit we gaz uniwersitetinde 2026-njy ýylyň 15-16-njy aprelinde ýurdumyzyň we daşary ýurtlaryň ýokary okuw mekdepleriniň talyplarynyň gatnaşmagynda IV Halkara açyk informatika internet olimpiadasy geçirildi

Türkmenistanyň Prezidentiniň Karary bilen tassyklanan “Türkmenistanda sanly ykdysadyýeti ösdürmegiň 2026-2028 ýyllar üçin Döwlet Maksatnamasy we ony amala aşyrmak boýunça ýerine ýetirilmeli çäreleriň Meýilnamasyna” laýyklykda hem-de Arkadagly Gahryman Prezidentimiziň ylymly-bilimli, giň dünýägaraýyşly, ýaş nesli kemala getirmek, talyplary ylma çekmek we zehinli ýaşlary ýüze çykarmak boýunça öňde goýan wezipelerini ýerine ýetirmek, ylym-bilim ulgamyna innowasiýalary ornaşdyrmak we bilimiň hiline garaşsyz monitoringi amala aşyrmak maksady bilen, 2026-njy ýylyň 15-16-njy aprelinde Ýagşygeldi Kakaýew adyndaky Halkara nebit we gaz uniwersitetinde ýurdumyzyň we daşary ýurtlaryň ýokary okuw mekdepleriniň talyplarynyň gatnaşmagynda IV Halkara açyk informatika internet olimpiadasy geçirildi.

Ýokary okuw mekdepleriniň talyplarynyň arasynda geçirilen IV Halkara açyk informatika internet olimpiadasy Türkmenistanda sanly bilim ulgamynyň yzygiderli durmuşa geçirilýändigini we ýaşlarymyzyň innowasion tehnologiýalardan ynamly baş çykarýandygyny görkezýär.

2026-njy ýylyň 15-16-njy aprelinde uniwersitetiň baş binasynda IV Halkara açyk informatika internet olimpiadasynyň açylyş dabarasy geçirildi. Açylyş dabarasynda Ýagşygeldi Kakaýew adyndaky Halkara nebit we gaz uniwersitetiniň rektory çykyş edip, olimpiada gatnaşýan talyplary we olaryň ýolbaşçy mugallymlaryny gutlady we uly üstünlikleri gazanmaklaryny arzuw etdi. Açylyş dabarasyna professor-mugallymlar, talyplar bilen bir hatarda sanly ulgam arkaly daşary ýurtlaryň ýokary okuw mekdepleriniň talyplary we olaryň ýolbaşçylary hem gatnaşdylar.

Halkara olimpiada 16 döwletden 57 sany ýokary okuw mekdeplerinden jemi                 793 talyp işjeň gatnaşdylar.

Olimpiada onlaýn görnüşinde daşary ýurtlardan, ýagny Germaniýa Federatiw Respublikasyndan, Rumyniýadan, Malaýziýadan, Gruziýadan, Hytaý Halk Respublikasyndan, Russiýa Federasiýasyndan, Belarus Respublikasyndan, Türkiýe Respublikasyndan, Gazagystan Respublikasyndan, Gyrgyz Respublikasyndan, Azerbaýjan Respublikasyndan, Ermenistan Respublikasyndan, Saud Arabystan patyşalygy, Liwiýa döwleti, Özbegistan Respublikasyndan, Täjigistan Respublikasyndan jemi 404 sany talyp gatnaşdy.

Olimpiadada Gazagystan Respublikasynyň K.I. Satbaýew adyndaky Milli gözleg-tehniki uniwersiteti, Özbegistan Respublikasynyň Buhara döwlet uniwersitetiniň, Belarus Respublikasynyň Ýefrosiniýa Poloskaýa adyndaky Polosk döwlet uniwersitetiniň, Türkmenistanyň Telekommunikasiýalar we informatika institutynyň, Ýagşygeldi Kakaýew adyndaky Halkara nebit we gaz uniwersitetiniň, Türkmenistanyň Döwlet energetika institutynyň, Türkmenistanyň Milli howpsuzlyk institutynyň, Türkmenistanyň Oguz han adyndaky Inžener – tehnologiýalar uniwersiteti talyplary aýratyn tapawutlanyp, baýrakly orunlara mynasyp boldular.

Ýagşygeldi Kakaýew adyndaky Halkara nebit we gaz uniwersiteti tarapyndan ýörite işlenilip düzülen milli programma üpjünçiliginiň kömegi arkaly toplanan ballaryň jemi boýunça olimpiadanyň şahsy ýeňijileri kesgitlenildi. Ýeňiji diýlip yglan edilen talyplar we toparlaýyn bäsleşigiň ýeňijileri uniwersitetiň rektory tarapyndan 1-nji, 2-nji we 3-nji derejeli diplomlar bilen sylaglandylar.

Ýagşygeldi Kakaýew adyndaky Halkara nebit we gaz uniwersiteti