Ýagşygeldi Kakaýew adyndaky Halkara nebit we gaz uniwersitetinde Türkmenistandaky Lu Ban ussahanasynyň açylyş dabarasy geçirildi

2026-njy ýylyň 16-njy aprelinde Türkmenistanyň Ministrler Kabinetiniň Başlygynyň Orunbasarlarynyň, Nebitgaz pudagynyň ministrleriň, pudaklaýyn dolandyryş edaralarynyň we uniwersitetiň ýolbaşçylarynyň, professor-mugallymlarynyň, talyp ýaşlarynyň, şeýle hem Hytaý Halk Respublikasynyň döwlet wekiliýetiniň, bu ýurduň Türkmenistandaky Ilçihanasynyň, Hytaýyň Milli nebitgaz korporasiýasynyň ýolbaşçylarynyň hem-de beýleki dabara çagyrylan hormatly myhmanlaryň gatnaşmaklarynda Türkmenistandaky Lu Ban ussahanasynyň açylyş dabarasy geçirildi.

Şeýle hem, Türkmenistan-Hytaý Halk Respublikasy: gaz pudagynda strategik hyzmatdaşlygyň 20 ýyllygy atly ylmy-amaly maslahatyň we türkmen-hytaý hyzmatdaşlygyna bagyşlanan serginiň çäginde Hytaýyň Bilim ministrliginiň Hytaý-daşary ýurt dilleri alyş-çalyş we hyzmatdaşlyk merkeziniň (Hytaý Halk Respublikasy), Ýagşygeldi Kakaýew adyndaky Halkara nebit we gaz uniwersitetiniň (Türkmenistan) we Hytaýyň nebit uniwersitetiniň (Pekin ş.) (Hytaý Halk Respublikasy) arasynda bilelikdäki Türkmen-Hytaý energetika okuw merkezini döretmek barada Ylalaşyga gol çekildi.

Häzirki döwürde dünýäniň Türkmenistan bilen dürli ugurlarda hyzmatdaşlyga gyzyklanma bildirýän döwletleri, öňdebaryjy tehnologiýalara eýe bolan iri daşary ýurt kompaniýalary, şeýle hem halkara guramalary bilen netijeli gatnaşyklar ýola goýuldy. Türkmenistan bilen Hytaýyň nebitgaz pudagyndaky netijeli gatnaşyklaryň milli bähbitlere we iki dostlukly döwletiň ösüşiniň ileri tutulýan ugurlaryna laýyk derejede ösdürilmegi munuň aýdyň beýanydyr. Bu ugurda köpýyllyk bilelikdäki işleriň netijeleri boýunça oňyn tejribe toplandy. Tebigy gazy dünýä bazarlaryna köpugurly esasda ugratmaga we gaz senagatynyň eksport mümkinçiliklerini giňeltmäge gönükdirilen giň möçberli taslamalar munuň aýdyň netijesidir. Şolaryň hatarynda Türkmenistan – Hytaý halkara gaz geçirijisini görkezmek bolar. Onda Ýewropanyň we Aziýanyň halklaryny müňýyllyklaryň dowamynda baglanyşdyran Beýik Ýüpek ýoluny täzeden dikeltmek, ýurdumyzyň nebitgaz känlerini özleşdirmek meseleleri öz beýanyny tapdy.

Gatnaşyklary gadymyýete daýanýan bu iki döwletiň nebit-gaz pudagynda hyzmatdaşlyk etmäge, ony halklarymyzyň we sebitiň abadançylygynyň, ösüşiň, özgerişiň, birek-birek bilen ynanyşmagyň bähbidine hyzmat etdirmäge bolan islegler iki tarapyň-da syýasy garaýyşlary bilen utgaşýar.

Şonuň üçin-de, uniwersitetde nebitgaz pudagy üçin ýokary derejeli hünärmenleri taýýarlamak boýunça ylym-bilim ulgamynda özara bähbitli halkara hyzmatdaşlygy has-da ösdürilýär.

Hormatly Arkadagly Gahryman Prezidentimiziň Hytaý Halk Respublikasyna amala aşyran döwlet saparynyň dowamynda 2023-nji ýylyň 6-njy ýanwarynda kabul edilen Türkmenistanyň we Hytaý Halk Respublikasynyň Bilelikdäki Beýannamasynda Lu Ban ussahanasy taslamasyny bilelikde amala aşyrmagy ilerletmek baradaky teklip öňe sürüldi.

Şunuň bilen baglylykda, 2024-nji ýylyň 18-nji oktýabrynda Hytaý Halk Respublikasynyň Sian şäherinde Ýagşygeldi Kakaýew adyndaky Halkara nebit we gaz uniwersiteti bilen Sian nebit uniwersitetiniň, Hebeý nebit hünär-tehniki uniwersitetiniň, Hytaýyň milli nebitgaz korporasiýasynyň we Hytaýyň bilim ulgamynda halkara alyş-çalyş assosiasiýasynyň arasynda özara düşünişmek hakynda Ähtnama gol çekildi.

Ähtnamanyň maksady Ýagşygeldi Kakaýew adyndaky Halkara nebit we gaz uniwersitetinde Türkmenistandaky Lu Ban ussahanasyny döretmek we işini ýola goýmak, “Gazylyp alynýan peýdaly magdanlaryň geologiýasy we gözlegi” hem-de “Maglumat ulgamlary we tehnologiýalary (nebitgaz pudagynda)” taýýarlyk ugurlary boýunça ýokary derejeli bakalawrlary we magistrleri taýýarlamak hem-de Hytaýyň Milli nebitgaz korporasiýasynyň “Internasional Ltd” Türkmenistandaky şahamçasynda we ýurdumyzyň nebitgaz toplumynda zähmet çekýän işgärleriň hünär derejesini ýokarlandyrmak boýunça okuwlary geçirmek bolup durýar.

Ýagşygeldi Kakaýew adyndaky Halkara nebit we gaz uniwersiteti bilen Hytaýyň Hebeý nebit hünär-tehniki uniwersitetiniň we Sianyň nebit uniwersitetiniň arasynda Türkmenistandaky Lu Ban ussahanasyny häzirki zaman gurnamalar we enjamlar bilen üpjün etmek taslamasyny durmuşa geçirmek hakynda baglaşylan Şertnama esasynda Hytaýyň milli nebitgaz korporasiýasy tarapyndan berlen muzdsuz grantyň hasabyna Türkmenistandaky Lu Ban ussahanasy sanly serişdeler (kompýuterler, programma üpjünçilikleri, serwerler, komutatorlar, monitorlar we ş.m.) we Geologiýa barlaghana enjamlary bilen doly enjamlaşdyryldy.

Türkmenistandaky Lu Ban ussahanasynda Hytaýyň hünärmenleri tarapyndan enjamlaryň we desgalaryň gurnama we sazlama işleri ýerine ýetirilip, sanly serişdeler we Geologiýa barlaghana enjamlary boýunça yzygiderli okuwlar geçirildi.

Ýagşygeldi Kakaýew adyndaky Halkara nebit we gaz uniwersitetinde döredilen Türkmenistandaky Lu Ban ussahanasy iki ýurduň arasyndaky ylym-bilim ulgamyndaky halkara hyzmatdaşlygyny has-da ösdürmeklige, giňeltmeklige, hytaý dilini öwrenmek boýunça okuwlary gurnamaklyga, professor-mugallymlaryň, hünärmenleriň we işgärleriň hünär derejesini ýokarlandyrmaklyga, professor-mugallymlary we talyplaryny alyşmaklyga, bilelikde okuw kitaplaryny, gollanmalary we monografiýalary taýýarlamaklyga ýardam berer.

Türkmenistanyň “Beýik Ýüpek ýoluny gaýtadan dikeltmek” strategiýasynyň “Bir guşak, bir ýol” hytaý başlangyjy bilen utgaşdyrylmagynyň çäklerinde Türkmenistanda ilkinji gezek döredilen Türkmenistandaky Lu Ban ussahanasynyň açylyş dabarasynyň “Garaşsyz, baky Bitarap Türkmenistan – bedew batly at-myradyň mekany” diýlip yglan edilen ýylyna gabat gelmeginiň uly simwoliki manysy bardyr.

Şu gün Türkmenistandaky Lu Ban ussahanasy Ýagşygeldi Kakaýew adyndaky Halkara nebit we gaz uniwersitetinde öz işine başlady.

Dabara gatnaşyjylar Türkmenistan bilen Hytaý Halk Respublikasynyň arasynda ylym-bilim ulgamynda halkara hyzmatdaşlygyny ösdürmekde giň mümkinçilikleri döredip berýän Gahryman Arkadagymyza we Hormatly Prezidentimize çuňňur minnetdarlyk bildirdiler.

Ýagşygeldi Kakaýew adyndaky Halkara nebit we gaz uniwersiteti