IŇLIS DILI MUGALLYMLARYNYŇ ARASYNDA GEÇIRILEN BÄSLEŞIK

Berkarar döwletiň täze eýýamynyň Galkynyşy döwründe Hormatly Prezidentimiziň baştutanlygynda ýurdumyzyň bilim ulgamynda ösüp gelýän ýaş nesle bilim we terbiýe bermegiň mazmunyny baýlaşdyrmak, mugallymlaryň hünär ussatlygyny kämilleşdirmek ileri tutulýan ugurlarynyň biridir.

 Balkan welaýatynyň Gyzylarbat etrap bilim bölüminiň garamagyndaky bilim edaralarynyň kitaphanalarynda Mukaddes Garaşsyzlygymyzyň şanly 35 ýyllygy, 2026-njy “Garaşsyz, baky Bitarap Türkmenistan – bedew batly at-myradyň mekany” ýyly mynasybetli geçirilmeli çäreleriň meýilnamasy esasynda etrabyň iňlis dili mugallymlarynyň arasynda “Iň gowy usuly gollanma” atly bäsleşik geçirildi.

Etrabyň 27-nji orta mekdebiniň binasynda geçirilen bu bäsleşik, döredijilikli zähmet çekýän, innowasion tehnologiýalary öz işinde ussatlyk bilen ulanýan mugallymlary ýüze çykarmakda we olaryň tejribesini ýaýratmakda möhüm ädim boldy. Bäsleşige gatnaşan mugallymlar iňlis dilini öwretmegiň döwrebap usullary, interaktiw oýunlar, şeýle hem sanly platformalaryň sapaklarda ulanylyşy boýunça özleriniň taýýarlan usuly gollanmalaryny we prezentasiýalaryny hödürlediler.

Bu bäsleşik diňe bir bäsdeşleriň meýdançasy bolman, eýsem, mugallymlaryň biri-birinden tejribe öwrenýän usuly maslahatlaşma merkezine hem öwrüldi. Alnan netijeler geljekde iňlis dili dersiniň okadylyşyny has-da kämilleşdirmäge ýardam eder.

Bäsleşigiň dowamynda mugallymlar iňlis diliniň grammatikasyny we söz baýlygyny (Grammar & Vocabulary) gyzykly görnüşde öwretmegiň, okuwçylaryň diňläp düşünmek (Listening) we gepleşik (Speaking) ukyplaryny ösdürmegiň täzeçil ýollaryny görkezdiler. Esasanam, usuly gollanmalarda audio-wideo materiallarynyň we multimedia çeşmeleriniň giňden ulanylmagyna emin agzalary tarapyndan ýokary baha berildi.

Emin agzalarynyň gelen netijesi boýunça aýratyn tapawutlanan iňlis dili mugallymlary, ýagny etrabyň 27-nji orta mekdebiniň iňlis dili mugallymy Maýa Babaýewa 1-nji orna, etrabyň 28-nji orta mekdebiniň iňlis dili mugallymy Gülkamar Gaýlyýewa 2-nji orna, etrabyň 10-njy orta mekdebiniň iňlis dili mugallymy Gülşat Baýryýewa 3-nji orna mynasyp boldular we bu tapawutlanan mugallymlar etrap bilim bölüminiň hormat hatlary bilen sylaglandylar. 

Bäsleşigiň ahyrynda oňa gatnaşyjylar ýaş nesillere döwrebap bilim-terbiýe bermekde döredilýän giň mümkinçilikler üçin türkmen halkynyň Milli Lideri Gahryman Arkadagymyza we hormatly Prezidentimiz Arkadagly Gahryman Serdarymyza çäksiz hoşallyklaryny beýan etdiler.

Gülbahar Ussaýewa,

Balkan welaýatynyň Gyzylarbat etrap bilim bölüminiň hünärmeni.