Okuw-tejribelik sapagy gurnaldy

“Garaşsyz, baky Bitarap Türkmenistan – bedew batly at-myradyň mekany” ýylynda türkmen halkynyň milli gymmatlygy bolan ahalteke bedewlerini ylmy taýdan öwrenmek maksady bilen Türkmenistanyň Oguz han adyndaky Inžener-tehnologiýalar uniwersitetiniň mugallymlarydyr talyp ýaşlary Arkadag şäherindäki “Türkmen atlary” Döwlet birleşiginiň Atçylyk ylmy-önümçilik merkezinde okuw-tejribelik sapagyny gurnadylar. Bu ýerde mugallymlar we talyplar uniwersitetiň çäginde işlenilen ylmy işleriň, taslama işleriň önümlerini merkeziň barlaghanalarynda seljerdiler we ylmy işgärlerden goşmaça ylmy maslahatlar aldylar. Atçylyk ylmy-önümçilik merkeziniň “Zootehniýa” barlaghanasynda, “Himiki we toksikologiýa” barlaghanasynda, “Weterinariýa” barlaghanasynda we ylmy-kliniki merkezinde okuw- tejribeliklerini geçdiler. Şeýle hem mugallymlar we talyplar Aba Annaýew adyndaky Halkara atçylyk akademiýasynyň kitaphana muzeýine gezelençleri gurap, bu ýerde ahalteke bedewiniň nesil daragty, ussat halypa seýisler baradaky maglumatlary we häzirki zaman ösüşlerini wasp edýän muzeý gymmatlyklaryny öwrendiler.