Balkanabat nebitçilik orta hünär okuw mekdebinde wagyz-nesihat çäresi geçirildi

Balkanabat şäherindäki «Türkmennebit» döwlet konserniniň Balkanabat nebitçilik orta hünär okuw mekdebinde wagyz-nesihat duşuşygy geçirildi. Bu çäre hukuk goraýjy edaralaryň, şeýle hem jemgyýetçilik guramalarynyň wekilleriniň gatnaşmagynda, esasan, talyp gelin-gyzlaryň arasynda geçirildi. Çäräniň esasy maksady ýaş nesliň hukuk medeniýetini ýokarlandyrmakdan we olaryň jemgyýetçilik borçlaryna bolan jogapkärçiligini artdyrmakdan ybarat boldy. Bu barada okuw edarasynyň saýtynda habar berilýär.

Duşuşygyň dowamynda çykyş eden hünärmenler kanunçylygyň kemsiz berjaý edilmeginiň ähmiýeti barada giňişleýin durup geçdiler. Kanunlaryň we düzgünleriň gyşarnyksyz berjaý edilmeginiň diňe bir döwletiň durnuklylygy üçin däl, eýsem her bir raýatyň asuda durmuşy üçin hem zerurdygy bellenildi. Şeýle-de ýaşlara öz hukuklaryny we borçlaryny dogry ulanmak boýunça gymmatly maslahatlar berlip, jemgyýetçilik tertibini saklamagyň möhümdigi nygtaldy.

Hukuk we jemgyýetçilik meselelerine bagyşlanan bu çäre talyplaryň jogapkärçilik duýgusyny berkitmäge ýardam etdi. Çykyşlarda ýaşlaryň jemgyýetde kabul edilen kadalary doly özleşdirip, olary wagyz etmelidikleri aýdyldy. Bu bolsa ýaş gelin-gyzlaryň kämil şahsyýetler bolup ýetişmeginde uly orun tutýar.

Çäräniň ahyrynda gatnaşyjylar ýaşlaryň döwrebap bilim almagy we kämilleşmegi ugrunda döredilýän giň mümkinçilikler üçin türkmen halkynyň Milli Lideri Gahryman Arkadagymyza hem-de hormatly Prezidentimiz Arkadagly Gahryman Serdarymyza çuňňur minnetdarlyk bildirdiler.