Ýagşygeldi Kakaýew adyndaky Halkara nebit we gaz uniwersitetiniň rektorynyň Hytaý Halk Respublikasyna sapary

Hytaýyň nebit uniwersitetiniň (Pekin ş.) guramagynda şu ýylyň 13-nji maýynda geçirilen “Hytaý Halk Respublikasynyň Başlygy Si Siznpiniň Hytaýyň nebit uniwersitetinde bilim alýan Merkezi Aziýa ýurtlarynyň talyplaryna ýazan möhüm jogap hatyny öwrenmek   we durmuşa geçirmek, şeýle hem “Bir guşak – bir ýol” başlangyjynyň çäklerinde eneregetika ulgamynda ýokary bilimiň ýokary hilli ösüşi”   atly simpoziuma gatnaşmak maksady bilen, Ýagşygeldi Kakaýew adyndaky Halkara nebit we gaz uniwersitetiniň rektory B.Atamanowyň Hytaý Halk Respublikasynyň Pekin şäherine gulluk iş sapary amala aşyryldy.

Saparyň ilkinji gününde rektor simpoziumyň işine işjeň gatnaşyp, “Türkmenistan we Hytaý: Ylym-bilim ulgamynda strategiki hyzmatdaşlygyň çäklerinde Nebitgaz pudagynyň önümçiligine innowasion tehnologiýalary ornaşdyrmak” atly temada çykyş etdi. Çykyşyň dowamynda golaýda Aşgabat şäherinde geçirilen “Türkmenistan-Hytaý Halk Respublikasy: gaz pudagynda strategik hyzmatdaşlygyň 20 ýyly” atly halkara ýokary derejeli ylmy-amaly maslahatynyň we sergisiniň geçirilendigi barada durup geçdi we şol güni Ýagşygeldi Kakaýew adyndaky Halkara nebit we gaz uniwersitetiniň çäginde “Türkmenistandaky Lu Ban ussahanasynyň” dabaraly ýagdaýda açylyp ulanmaga berilendigi barada maglumatlar simpoziuma gatnaşyjylara ýetirdi. Şeýle hem, Hytaýyň nebit uniwersiteti bilen bilelikdäki Türkmen-Hytaý energetika okuw merkezini döretmek hakynda Ylalaşyga gol çekilendigi bellenildi.

Soňra türkmen wekiliýeti simpozium bilen utgaşykly geçirilen medeni festiwalyň açylyş dabarasyna gatnaşdy. Dabarada bu ýokary okuw jaýynda bilim alýan türkmen talyp ýaşlary milli küşt depdi tansyny şowhunly ýerine ýetirdiler. Şeýle-de medeni çäräniň çäklerinde Türkmenistanly talyp ýaşlaryň taýýarlan sergi pawilionyna baryp görüldi hem-de talyp ýaşlar bilen olaryň ýaşaýyş we okuw şertleri babatynda gürrüňdeşlik geçirildi.

Şeýle hem, Hytaýda we Türkmenistanda Halkara iki diplom maksatnamasyny okuw prosesine ornaşdyrmagyň meseleleri ara alnyp maslahatlaşyldy. Bu maksatnamany maliýeleşdirmek işine gatnaşýan Hytaýyň Dil bilimi we hyzmatdaşlyk boýunça merkeziniň Baş direktorynyň orunbasary Ýaň Žou Ýagşygeldi Kakýew adyndaky Halkara nebit we gaz uniwersitetiniň talyplary üçin talyp hakaryny hödürlemäge taýýardygyny mälim etdi.

Saparyň ikinji gününde türkmen wekili Hytaýyň nebit uniwersitetiniň geologiýa we himiýa barlaghanalarynda alnyp barylýan okuw we ylmy işler, şeýle hem emeli aňyň (AI) okuw prosesine ornaşdyrylyşy bilen tanyşdyryldy we geljekde onuň uniwersitetiň okuw prosesine hem-de Nebitgaz pudagynyň önümçiligine ornaşdyrmak boýunça tejribe alyşmaklygyň zerurdygyny nygtady.

Soňra Hytaýyň Milli Nebitgaz korporasiýasynyň sanly ulgam we emeli aň boýunça ýöriteleşen filialy bolan Kunlun Shuzhi kompaniýasynyň alyp barýan işleri bilen hem-de bu ýerde Nebitgaz pudagynyň sanlylaşdyrylyşy, enjamlaryň öndürilişi, önümçilik prosesine gözegçilik edilişi hem-de geologiki gözlegleri amala aşyrmak işlerinde emeli aňyň ornaşdyrylyşy bilen bagly programma üpjünçiligi we robototehnika labaratoriýasy bilen tanyşyldy.

Saparyň soňky gününde Hytaýyň Sian nebit uniwersitetiniň,   şeýle-de Hebeý nebit hünär-tehniki uniwersitetiniň ýolbaşçylary bilen “Türkmenistandaky Lu Ban ussahanasyna” goşmaça enjamlary satyn almagyň meselelerine bagyşlanan iş duşuşugy geçirildi. Iş duşuşygynyň dowamynda hytaý tarapy ussahanany enjamlaşdyrmagyň 3-nji tapgyry bilen bagly alnyp barylýan işler bilen türkmen wekilini içgin tanyşdyrdylar. Türkmen tarapy ussahananyň okuw we ylmy-barlag işlerini tizleşdirmegiň zerurlygyna hytaý tarapynyň ünsüni çekip, ussahananyň işinde amaly hereketlere başlamaklyga we işiň doly ýola goýulmagyny gazanmaklyga çagyrdy.

Ýagşygeldi Kakaýew adyndaky Halkara nebit we gaz uniwersiteti