Çagalary goramagyň halkara güni

Şu gün asylly däbe görä, paýtagtymyzda we tutuş ýurdumyzda Çagalary goramagyň halkara güni mynasybetli baýramçylyk dabaralary geçirildi. Bu senäniň milli senenamamyzdaky baýramçylyklaryň hataryna girizilmegi, Türkmenistanda ösüp gelýän ýaş nesilleriň hemmetaraplaýyn alada bilen gurşalandygynyň, Watanymyzyň BMG – nyň kabul eden Çaganyň hukuklary hakyndaky Konwensiýasynda tassyklanan esasy ugurlary ygrarlydygynyň aýdyň beýanydyr. Ýaşajyk raýatlaryň abadançylygy we sazlaşykly ösmegi, saglyklaryny berkitmegi, ýokary hilli bilim almak mümkinçiligine eýe bolmaklary bilen bagly meseleler hormatly Prezidentimiz Serdar Berdimuhammedowyň baştutanlygynda durmuşa geçirilýän döwlet syýasatynyň ileri tutulýan ugrydyr. Şunuň bilen baglylykda, hossarçylyga mätäç çagalara yzygiderli üns berilýär. Şeýle - de ýörite durmuş goldawyna mätäç çagalary durmuşa ugrukdyrmak, olary özbaşdak ýaşaýşa taýýarlamak boýunça hemmetaraplaýyn işler amala aşyrylýar.

Şu gün Gahryman Arkadagymyzyň hemaýaty, Arkadagly Gahryman Serdarymyzyň sowgady paýtagtymyzdaky Döwletliler köşgünde terbiýelenýän çagalara dabaraly ýagdaýda gowşuryldy. Köşkde terbiýe, bilim alýan çagalar üçin ýatdan çykmajak şatlykly pursatlara öwrüldi. Çagalar bagtyýar durmuş ugrunda Ähli zerur şertleriň döredilýändigi, özleriniň hemmetaraplaýyn alada bilen gurşalandygy üçin hormatly Prezidentimize we Gahryman Arkadagymyza tüýs ýürekden hoşallyk sözlerini beýan etdiler. Çagalary goramagyň halkara güni mynasybetli köşgümizde geçirilen haýyr - sahabat çäreleri hem aýdym – sazly dabaralar bilen utgaşdy. Munuň özi halkymyzyň köpasyrlyk ruhy – ahlak däplerini we umumyadamza tähmiýetli gymmatlyklara esaslanýan, şeýle hem jemgyýetimizde deňeçer mümkinçilikleriň döredilmegine gönükdirilen ýörelgeleri esasy ugur edinýän Türkmenistanyň durmuş ugurly syýasatynyň üstünlikli amala aşyrylýandygynyň aýdyň beýanydyr. Bu işleriň ählisi her bir ýaş nesliň alada bilen gurşalmagyny öz içine alýan we Watanymyzyň geljekki ösüşine mynasyp goşant goşjak hemmetaraplaýyn bilimli, ruhy taýdan sagdyn, berk bedenli ýaş nesilleriň kemala gelmegine gönükdirilen döwlet syýasatynyň üstünlikli durmuşa geçirilmeginde öz beýanyny tapdy.  

Birleşen Arap Emirlikleriniň

Prezidenti Şeýh Zaid bin Sultan

Al Nahaýýan adyndaky Döwletliler

köşgüniň mugallymy Pälwan Abaýew