GELJEGE NURLY ÝOL: TDBGI-de «Durnukly ösüş maksatlary» gurnagynyň dabaraly açylyşy we Çagalary goramagyň halkara gününe bagyşlanan çäre geçirildi

2026-njy ýylyň 1-nji iýunynda Türkmen döwlet binagärlik-gurluşyk institutynda 1-nji iýun – Çagalary goramagyň halkara güni mynasybetli çäre geçirildi. Bu ajaýyp senä gabatlanyp, institutyň ylym we döredijilik durmuşynda täze sahypany açan «Durnukly Ösüş Maksatlary» (DÖM) ylmy-döredijilik gurnagynyň dabaraly açylyşy hem-de Çaganyň hukuklary hakynda Konwensiýa (ÇHHK) boýunça bilim beriş duşuşygy guraldy.

Çäre TDBGI-niň Ylym bölüminiň başlygy Amanmyrat Arazowyň täze DÖM gurnagynyň açylyş bagyny dabaraly ýagdaýda kesmegi bilen başlandy. Açylyş dabarasynda çykyş edenler – Yslam Saryjaýew we Aýbölek Aşyrowa gurnagyň esasy maksatlary we wezipeleri barada türkmen hem-de iňlis dillerinde giňişleýin tanyşdyrdylar. Şeýle-de, Himiýa tehnologiýasy fakultetiniň “Diller” kafedrasynyň müdiri we gurnagyň ylmy ýolbaşçysy Baýramtäç Oraztaganowa çykyş edip, bu ylmy-döredijilik başlangyjynyň talyplar üçin möhümdigini nygtady. Institutyň ýolbaşçylarynyň mähirli gutlaglary we täze agzalara DÖM gurnagynyň nyşanlarynyň gowşurylmagy ýaşlary täze üstünliklere ruhlandyrdy.

Çäräniň aýratyn şowhunly we täsirli bölümi çagalar we ýaşlar üçin guralan interaktiw bilim beriş duşuşygy boldy. Bu duşuşyga dürli ýaşdaky 30-dan gowrak çaga öz ene-atalary (institutyň mugallymlary we işgärleri) bilen bilelikde gatnaşdylar. Çärä şeýle-de “Diller” kafedrasynyň mugallymlary, DÖM gurnagynyň agzalary we beýleki myhmanlar gatnaşdylar.

Çagalara öz hukuklaryny we durnukly ösüş düşünjelerini aňsat hem-de gyzykly usulda öwretmek maksady bilen Çaganyň hukuklary hakynda Konwensiýa barada çagalaryň ýaş aýratynlyklaryna laýyklykda iki dilde gyzykly maglumatlar berildi. Çärä gatnaşanlara çaganyň hukuklary barada ýörite taýýarlanan öwrediji wideolar görkezildi. Şeýle hem, maglumat beriş çykyşlaryndan soňra, DÖM gurnagynyň agzalarynyň alyp barmagynda dürli interaktiw oýunlar guraldy. Bu şatlykly oýunlar çagalara çylşyrymly bolup görünýän hukuk we durnuklylyk düşünjelerini aňsatlyk bilen özleşdirmäge kömek etdi.

Bu çäre diňe bir maglumat bermek bilen çäklenmän, eýsem durnukly ösüş we çagalaryň geljegi barada nesiller arasyndaky arabaglanşygy we dialogy ösdürmäge uly goşant goşdy. Çagalaryň gülküsi we gyzyklanmasy eýwanlara ýaýrap, dabara ýakymly öwüşgin çaýdy.

Duşuşygyň ahyrynda erkin gürrüňdeşlik (networking) uly ýaşlylara pikir alyşmaga mümkinçilik döreden bolsa, bilelikde ýadygärlik surata düşmek dabarasy bu ajaýyp günüň TDBGI-niň we DÖM gurnagynyň taryhynda ýatdan çykmajak pursada öwrülmegini üpjün etdi.