Türkmenistanyň ilçisi Pakistanyň Ýokary Bilim Komissiýasynyň başlygy bilen duşuşdy

Türkmenistanyň Yslamabatdaky Adatdan daşary we Doly ygtyýarly ilçisi Atajan Möwlamow Pakistanyň Ýokary Bilim Komissiýasynyň başlygy Niaz Ahmad Ahtar bilen iş duşuşygyny geçirdi. Gyzyklanma bildirilip geçirilen gepleşikleriň esasy mowzugy iki döwletiň arasynda ýokary bilim, düýpli ylym we giň gerimli akademiki alyş-çalyş ulgamynda uzak möhletleýin hyzmatdaşlygy pugtalandyrmagyň strategik mümkinçiliklerini jikme-jik ara alnyp maslahatlaşylmagy boldy.

Duşuşygyň dowamynda taraplar ikitaraplaýyn gatnaşyklary dürli ugurlarda has-da ösdürmek üçin uly mümkinçilikleriň bardygyny nygtadylar. Şeýle-de ylmy-barlag işlerinde hyzmatdaşlygy giňeltmegiň, ýokary hünärli adam maýasyny ösdürmegiň we akademiki hereketliligiň ähmiýetiniň barha artýandygy bellenildi.

Söhbetdeşler esasy ünsi Türkmenistanyň we Pakistanyň öňdebaryjy ýokary okuw mekdepleriniň arasynda göni hyzmatdaşlyk gatnaşyklaryny ýola goýmak üçin amaly mümkinçilikleri döretmäge gönükdirdiler. Hususan-da, talyplaryň, mugallymlaryň we ýaş alymlaryň yzygiderli alyş-çalşyny guramak, şeýle hem bilelikdäki bilim, tehnologik we ylmy-barlag taslamalaryny hemmetaraplaýyn goldamak meseleleri ara alnyp maslahatlaşyldy.

Duşuşygyň ahyrynda Atajan Möwlamow bilen Niaz Ahmad Ahtar yzygiderli dialogy dowam etdirmäge we iki ýurduň ylym-bilim hem-de medeni giňişliklerini has-da ýakynlaşdyrmaga hyzmat etjek özara bähbitli taslamalary ilerletmäge taýýardyklaryny tassykladylar.

Bu duşuşyk Pakistan bilen gatnaşyklarymyzyň ýene bir möhüm ugruny — ynsanperwer we bilim hyzmatdaşlygyny görkezýär. TOPH ýaly iri energetika taslamalary bilen bir hatarda adam maýasyny ösdürmek we akademiki alyş-çalyş maksatnamalaryny giňeltmek hem örän uly ähmiýete eýedir.

Çeşmesi: ORIENT