Türkmenistan durnukly oba hojalygy we suw serişdelerini dolandyrmak boýunça Italiýada guralan halkara okuw maslahatyna gatnaşdy

Italiýa Respublikasynyň Bolonýa şäherinde 2026-njy ýylyň 14–20-nji iýuny aralygynda “Italiýa – Merkezi Aziýa” formatyndaky hyzmatdaşlygyň çäklerinde “Durnukly institusional dialogy döretmek (BRIDGE)” atly taslama boýunça okuw maslahaty geçirildi. “Oba hojalygynyň durnukly ösüşi” mowzugyna bagyşlanan bu çärä S.A.Nyýazow adyndaky Türkmen oba hojalyk uniwersitetiniň mugallymlary hem gatnaşdylar. Ýewropa Bileleşiginiň we Italiýanyň Ka' Foskari uniwersitetiniň utgaşdyrmagynda guralan çäräniň öňüsyrasynda, gatnaşyjylar üçin iki hepdäniň dowamynda regional hyzmatdaşlyk, ekologiýa we suw serişdelerini dolandyrmak boýunça onlaýn okuw tapgyry guraldy.

Okuw programmasy dünýäniň iň köne we abraýly ýokary okuw jaýlarynyň biri bolan Bolonýa uniwersitetiniň Aziýa institutynda badalga aldy. Dabaranyň açylyşynda uniwersitetiň wise-rektory we institutynyň ýolbaşçylary çykyş edip, halkara ylmy hyzmatdaşlygyň durnukly ösüşdäki ähmiýetini bellediler. Okuw maslahatynyň ilkinji gününde Türkmenistanyň, Gazagystanyň, Özbegistanyň, Gyrgyzystanyň we Täjigistanyň resmi wekilleri öz ýurtlarynda oba hojalygy we suw tygşytlaýjy tehnologiýalar barada durmuşa geçirilýän taslamalary tanyşdyrdylar.

Maksatnamanyň dowamynda Italiýanyň öňdebaryjy professorlary tarapyndan takyk oba hojalygy, emeli aň, kiber-gurallar, sanly ulgamlar we howanyň üýtgemeginiň agrar pudaga täsirleri barada leksiýalar okaldy. Şeýle hem gatnaşyjylara gurakçylyga garşy göreşmek, innowasion suwaryş ulgamlaryny ulanmak we halkara derejeli taslamalary meýilleşdirmek boýunça amaly sapaklar geçirilip, toparlaýyn işler guraldy.

Okuwyň çäklerinde amaly meýdan saparlaryna uly orun berildi. Gatnaşyjylar Emiliýa-Romanýa Sebit Hökümetiniň binasynda bolup, Ýewropa Bileleşiginiň agrar standartlary we oba hojalyk bilimleriniň integrirlenen ulgamy (AKIS) bilen tanyşdylar. Mundan başga-da, dünýä belli “Canale Emiliano Romagnolo” suwaryş kanalyna, “ACQUA CAMPUS” ylmy-barlag synag merkezine, Ýewropanyň iň iri suw desgalarynyň biri bolan “Codigoro” nasos stansiýasyna hem-de “Salvi Vivai” innowasion nahalhanasyna gezelenç guraldy. Bu ýerlerde innowasion gidrawlik tehnologiýalaryň, suwy tygşytlaýan kiber-gurallaryň işi we dürli howa şertlerine çydamly ekinleri ýetişdirmegiň usullary amaly görnüşde görkezildi.

Okuw maksatnamasynyň amaly we nazary tapgyrlaryny üstünlikli tamamlan gatnaşyjylara Bolonýa uniwersitetiniň Aziýa institutynyň ýolbaşçylary we halkara bilermenler tarapyndan resmi halkara şahadatnamalar gowşuryldy. Saparyň netijesinde italýan hünärmenleriniň durnukly oba hojalygy, takyk suwaryş we durnukly gidrotehniki ulgamlar boýunça innowasion tejribeleri öwrenildi, şeýle hem geljekde bilelikdäki ylmy taslamalary düzmegiň halkara ülňüleri özleşdirildi.