Türkmenistanyň Oguz han adyndaky Inžener-tehnologiýalar uniwersitetiniň wekilleri CDIO 2026 halkara maslahatyna gatnaşdylar

Türkmenistanyň Oguz han adyndaky Inžener-tehnologiýalar uniwersitetiniň wekilleri Beýik Britaniýanyň Liwerpul şäherindäki Liwerpul uniwersitetinde 2026-njy ýylyň 22–25-nji iýuny aralygynda geçirilýän «CDIO bilim platformasynyň» 22-nji halkara maslahatyna gatnaşdylar.

Türkmen wekiliýetiniň düzümine Türkmenistanyň Oguz han adyndaky Inžener-tehnologiýalar uniwersitetiniň Kiberfiziki ulgamlar kafedrasynyň uly mugallymy Yslam Orazow hem-de Türkmenistanyň Oguz han adyndaky Inžener-tehnologiýalar uniwersitetiniň «Oguz han» ylmy tehnologiýalar merkeziniň direktory Ahal Akgaýew girýärler.

Halkara maslahatyň esasy temasy «Talyplaryň hünär taýdan ösüşini kämilleşdirmek: bahalandyrmada we pikir-berişde innowasiýa» bolup, ol inženerçilik biliminde talyplaryň hünär başarnyklaryny ösdürmek, döwrebap bahalandyrma usullaryny ornaşdyrmak hem-de netijeli pikir-beriş (feedback) ulgamyny kämilleşdirmek meselelerine bagyşlanýar.

CDIO halkara maslahaty inženerçilik biliminiň häzirki zaman ugurlary, täzeçil okuw usullary, ylmy-barlag işleriniň netijeliligi hem-de ýokary hünärli inženerleri taýýarlamak boýunça öňdebaryjy tejribeleri alyşmak maksady bilen dünýäniň dürli ýurtlarynyň ýokary okuw mekdepleriniň wekillerini bir ýere jemleýär.

Şu ýylky CDIO 2026 halkara maslahatyna dünýäniň 27 ýurdundan 71 ýokary okuw mekdebiniň 157 wekili gatnaşdy. Maslahat inženerçilik biliminde öňdebaryjy tejribeleri alyşmak, innowasion çemeleşmeleri ara alyp maslahatlaşmak we halkara akademik hyzmatdaşlygy ösdürmek üçin möhüm meýdança boldy.

CDIO (Conceive – Design – Implement – Operate) başlangyjy inženerçilik biliminiň innowasion ulgamyny ösdürmäge gönükdirilen halkara hyzmatdaşlyk platformasy bolup, onuň esasy maksady talyplarda taslama taýýarlamak, döretmek, durmuşa geçirmek we ulanmak ýaly tapgyrlar arkaly amaly inženerçilik başarnyklaryny kemala getirmekden ybaratdyr. Bu başlangyç dünýäniň köp sanly abraýly ýokary okuw mekdeplerini özünde jemleýär

Liwerpul uniwersitetinde geçirilen halkara forumyň çäklerinde dünýäniň dürli ýurtlaryndan gelen alymlar, mugallymlar, hünärmenler we talyplar inženerçilik biliminiň ösüşiniň geljegi, sanly tehnologiýalaryň ornaşdyrylmagy, taslama esasly okuw usullary hem-de täzeçil bilim çözgütleri boýunça pikir alyşdylar.

Halkara çärede Türkmenistanyň Oguz han adyndaky Inžener-tehnologiýalar uniwersitetiniň wekilleri çykyş edip, ýokary okuw mekdebinde alnyp barylýan ylmy işler, kiberfiziki ulgamlar, häzirki zaman tehnologiýalary we inženerçilik bilimini ösdürmek boýunça tejribeler bilen tanyşdyrdylar. Şeýle hem olar CDIO-nyň giň akademik jemgyýetçiligi bilen işjeň hyzmatdaşlyk edýärler.

Türkmen wekilleriniň bu halkara maslahata gatnaşmagy uniwersitetiň okuw maksatnamalaryny dünýä standartlaryna laýyklykda kämilleşdirmek, taslama gönükdirilen bilim beriş usullaryny ösdürmek hem-de halkara hyzmatdaşlygyň gerimini giňeltmek boýunça möhüm ädim bolup durýar.

Türkmenistanyň Oguz han adyndaky Inžener-tehnologiýalar uniwersitetiniň 2023-nji ýylyň martynda Merkezi Aziýa ýurtlarynyň ýokary okuw mekdepleriniň arasynda ilkinji bolup CDIO guramasynyň doly hukukly agzasy hökmünde kabul edilendigini bellemek gerek. Şondan bäri uniwersitet CDIO-nyň çäklerinde geçirilýän halkara ylmy-amaly we bilim çärelerine işjeň gatnaşyp, inženerçilik biliminiň täzeçil ugurlaryny ösdürmek boýunça işleri dowam etdirýär.