Türkmen oba hojalyk uniwersitetinde täze «CLAAS» kombaýnlaryny öwrenmek boýunça maslahatlar geçirildi

Ýurdumyzda dowam edýän galla oragy möwsümine utgaşyklylykda, Türkmenistana Germaniýanyň «CLAAS» kompaniýasynyň ýokary öndürijilikli däne orujy kombaýnlarynyň täze tapgyry getirildi. Şonlukda, S.A.Nyýazow adyndaky Türkmen oba hojalyk uniwersiteti bu häzirki zaman tehnikalaryny dolandyrmaga ukyply ýokary derejeli hünärmenleri taýýarlamak ugrunda kompaniýanyň wekilleri bilen hyzmatdaşlygy has-da güýçlendirýär. Bu barada ýokary okuw jaýynyň resmi saýtynda habar berildi.

Bu netijeli gatnaşyklar 2016-njy ýylyň 29-njy awgustynda uniwersitet bilen Germaniýanyň «Umax Trade GmbH» kompaniýasynyň arasynda gol çekilen özara hyzmatdaşlyk baradaky Ähtnama esaslanýar. Häzirki wagtda ýokary okuw mekdebiniň çäginde hereket edýän «CLAAS» okuw merkezi şol resminamanyň esasynda talyplara we hünärmenlere yzygiderli bilim we tejribe bermek işlerini amala aşyrýar.

Ylalaşygyň çäklerinde golaýda uniwersitetiň oba hojalygynyň mehanizasiýasy fakultetiniň mugallymlary we talyplary üçin ýörite ylmy-önümçilik maslahatlary guraldy. Maslahatlarda traktorlaryň transmissiýalarynyň, gidrawliki we elektrik ulgamlarynyň gurluşy hem-de däne ýygýan kombaýnlaryň işledilişi we sazlanyşy ýaly möhüm temalar ara alnyp maslahatlaşyldy.

Germaniýanyň «Umax Trade GmbH» kompaniýasynyň hünärmeni Ildar Konowalow çärelerde çykyş edip, gatnaşyjylaryň özlerini gyzyklandyrýan soraglaryna jikme-jik jogap berdi. «CLAAS» okuw merkezinde yzygiderli geçirilýän bu okuwlar oba hojalyk pudagy üçin geljekki ýokary hünärli mehanizatorlary ýetişdirmekde uly ähmiýete eýedir.