Syýasy söhbetdeşlik geçirildi

2026-nji ýylyň iýul aýynyň 4-ne Türkmenistanyň Döwlet energetika institutynda söhbetdeşlik geçirildi. Söhbetdeşligiň dowamynda hormatly Prezidentimiziň parasatly baştutanlygynda Türkmenistanyň bilim ulgamy dünýäniň ösen döwletleriniň bilim giňişligine işjeň goşulyşýandygy, ýurdumyzda ylym-bilim ulgamyny döwrebaplaşdyrmak, halkara hyzmatdaşlygyny pugtalandyrmak we milli bilimiň dünýä ülňülerine laýyklygyny üpjün etmek ugrunda giň gerimli işler amala aşyrylýandygy barada aýdyldy.

Hususan-da, 2026-njy ýylyň iýun aýynyň 20-30-y aralygynda Türkmenistanyň Döwlet energetika institutynyň mugallymlarynyň Bolgariýa Respublikasynyň Ruse şäherindäki Angel Каnçew adyndaky Ruse uniwersitetine iş saparyny amala aşyrandygy, bu iş saparyň  Ýewropa Bileleşiginiň Erasmus+ maksatnamasynyň çäklerinde guralandygy, onuň esasy maksadynyň professor-mugallymlaryň hünär derejesini ýokarlandyrmak, okatmagyň innowasion usullary boýunça tejribe alyşmak, sanly bilim tehnologiýalaryny ornaşdyrmak we halkara ylmy hyzmatdaşlygy giňeltmekden ybaratdygy barada giňişleýin gürrüň edildi.

Iş saparyň çäklerinde guralan “CompSysTech'26” (“International Conference on Computer Systems and Technologies”) atly kompýuter ulgamlary we tehnologiýalary boýunça halkara ylmy maslahata gatnaşan mugallymlar dürli ýurtlardan gelen alymlar, gözlegçiler hem-de professor-mugallymlar bilen emeli aň, maglumat ulgamlary, programma üpjünçiligi, sanly transformasiýa, kiberhowpsuzlyk, bulut tehnologiýalary, maglumat-kommunikasiýa ulgamlary hem-de kompýuter ulgamlarynyň kämilleşdirilmegi bilen bagly ylmy barlaglaryň netijeleri giňişleýin ara alnyp maslahatlaşylandygy dogrusynda gürrüň berdiler.

Erasmus+ maksatnamasynyň çäklerinde ýerine ýetitilen bu iş sapary, Türkmenistanyň Döwlet energetika institutynyň professor-mugallymlarynyň hünärlerini kämilleşdirmegine, dünýäniň öňdebaryjy ylmy-bilim tejribelerini öwrenmegine, innowasion tehnologiýalary milli bilim ulgamyna ornaşdyrmagyna we halkara hyzmatdaşlygyny has-da pugtalandyrmagyna uly mümkinçilikler döretdi. Bu saparyň netijesinde institutyň we onuň daşary ýurtly hyzmatdaşlarynyň arasynda ýola goýlan gatnaşyklaryň has-da pugtalanmagyna we umumy bilim ulgamynyň halkara giňişligindäki abraýynyň ýokarlanmagyna goşant goşjakdygy şübhesizdir.

 Söhbetdeşlik dolulygyna Ýaşlyk teleýaýlymy tarapyndan teleýazgy edildi. Söhbetdeşligiň ahyrynda oňa gatnaşyjylar ýurdumyzda ylym-bilimi kämilleşdirmekde, halkara gatnaşyklary ýokarlandyrmakda, halkara bilermenler bilen tejribe alyşmakda, ýaşlary ýokary derejesinde hünärmenler edip ýetişdirmekde bimöçber tagallalary edýän Türkmen halkynyň Milli Lideri Gahryman Arkadagymyza, Hormatly Prezidentimiz Arkadagly Gahryman Serdarymyza alkyş hem-de hoşallyk sözlerini beýan etdiler.

Türkmenistanyň Döwlet energetika instituty