Türkmen talyby Duşenbede geçirilen žurnalistika boýunça tomusky okuwa gatnaşdy

Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 1-nji ýyl talyby Ýusup Orazow şu ýylyň 28-nji iýuny — 12-nji iýuly aralygynda Täjigistan Respublikasynda geçirilen Ýewropada Howpsuzlyk we Hyzmatdaşlyk Guramasynyň (ÝHHG) žurnalistika boýunça tomusky okuwyna gatnaşdy. Bu barada ýokaru okuw mekdebiniň resmi saýtynda habar berildi.

Merkezi Aziýanyň ýaş media hünärmenleri we geljekki žurnalistleri üçin guralan bu maksatnama Ýewropa Bileleşiginiň Täjigistandaky wekilhanasynyň goldawy bilen ÝHHG-nyň Duşenbedäki Maksatnamalaýyn edarasy tarapyndan durmuşa geçirildi. Okuwyň dowamynda häzirki zaman köpçülikleýin habar beriş serişdeleriniň esasy ugurlaryna, hünär etikasynyň kadalaryna, media sowatlylygyny ösdürmäge hem-de ýalan maglumatlara (dezinformasiýa) garşy göreşmegiň usullaryna aýratyn üns berildi.

Şu ýyl sebitiň öňdebaryjy ýokary okuw mekdeplerinden, şol sanda Merkezi Aziýa Uniwersitetinden (UCA), Şanhaýyň Nýu-Ýork Uniwersitetinden (NYU Shanghai), “Ala-Too” halkara uniwersitetinden we Özbegistanyň Döwlet dünýä dilleri uniwersitetinden jemi 20 sany saýlama talyp we ýaş hünärmen gatnaşdy.

Amaly okuwlaryň çäginde gatnaşyjylar Täjigistanyň “Safina” döwlet teleýaýlymynyň işi bilen tanyşdylar. Olar studiýanyň tehniki enjamlaryny gözden geçirip, žurnalistleriň göni ýaýlymdaky iş aýratynlyklaryny we dessin habarlary taýýarlamagyň usullaryny ele aldylar.

Bu halkara maksatnama sebitiň geljekki hünärmenleriniň özara tejribe alyşmaklaryny we professional gatnaşyklary ýola goýmagy üçin netijeli meýdança boldy. Guramaçylar geljek ýylda hem şular ýaly okuwlary dowam etdirmegi meýilleşdirýärler.

Tomusky okuwyň jemleri boýunça Ýusup Orazowa okuwy üstünlikli tamamlandygy barada halkara şahadatnamasy gowşuryldy.