«Garaşsyzlygyň merjen däneleri» bäsleşiginiň jemleýji döwlet tapgyryna taýýarlyk görülýär

Türkmenistanda zehinli çagalaryň arasyndaky «Garaşsyzlygyň merjen däneleri» atly bäsleşigiň jemleýji döwlet tapgyryny guramaçylykly geçirmek boýunça degişli işler alnyp barylýar. Bu ugurdaky taýýarlyk çäreleri barada wise-premýer Batyr Mämmedow 18-nji iýulda sanly ulgam arkaly geçirilen Türkmenistanyň Ministrler Kabinetiniň nobatdaky mejlisinde Prezident Serdar Berdimuhamedowa hasabat berdi. Bu barada «Türkmenistan: Altyn asyr» elektron gazeti habar berdi.

Ýaş nesliň zehin-başarnyklaryny ýüze çykarmakda we olaryň sungata bolan söýgüsini artdyrmakda bu bäsleşigiň ähmiýeti örän uludyr. Sungat bäsleşiginiň deslapky tapgyrlarynda Garaşsyz, baky Bitarap Watanymyzy hem-de bagtyýar döwrümizi wasp edýän aýdym-sazlary ýokary ussatlyk bilen ýerine ýetiren çagalaryň 21-si, şeýle hem tans, aýdym-saz we halk döredijilik toparlarynyň 14-si jemleýji döwlet tapgyryna gatnaşmaga hukuk gazandylar. Şunuň bilen baglylykda, wise-premýer döwlet Baştutanymyzyň garamagyna degişli teklibi hödürledi.

Türkmenistanyň Prezidenti Serdar Berdimuhamedow hasabaty diňläp, Türkmenistanda ýaş nesilleriň döwrebap bilim-terbiýe almagy we döredijilik bilen meşgullanmagy üçin ähli şertleriň döredilýändigini nygtady. Döwlet Baştutanymyz hödürlenen teklibi goldap, wise-premýere «Garaşsyzlygyň merjen däneleri» bäsleşiginiň jemleýji tapgyryna talabalaýyk taýýarlyk görmegi we ony ýokary guramaçylyk derejesinde geçirmegi tabşyrdy.