Türkmen mugallymlary Italiýanyň Peruja uniwersiteti bilen hyzmatdaşlygyň çäklerinde hünärlerini kämilleşdirýärler

Magtymguly adyndaky Türkmen döwlet uniwersiteti bilen Perujanyň daşary ýurtlylar üçin uniwersitetiniň arasynda baglaşylan özara düşünişmek hakyndaky Ähtnama laýyklykda bilelikdäki taslamalar üstünlikli durmuşa geçirilýär. Şu resminamanyň çäklerinde roman-german dilleri kafedrasynyň italýan dili mugallymlary Kümüş Myradowa we Selbi Gurbanowa Italiýa Respublikasynyň agzalan hyzmatdaş ýokary okuw mekdebinde hünär kämilleşdiriş okuwlaryna gatnaşýarlar. Bu barada ýokary okuw mekdebiň resmi saýtynda habar berildi.

Aşgabat bilen Rimiň arasyndaky ýokary bilim, ylym hem-de medeni-ynsanperwer ulgamlardaky hyzmatdaşlyk barha durnukly häsiýete eýe bolýar. Iki döwletiň bilelikdäki gatnaşyklary talyplary hem-de mugallymlary ylym-bilim babatda alyş-çalyş maksatnamalaryna çekmek, italýan dilini we medeniýetini öwrenmek, şeýle hem Italiýanyň öňdebaryjy uniwersitetleri bilen göni hyzmatdaşlygy ösdürmek ýaly möhüm ugurlary öz içine alýar.

Bilim pudagyndaky hyzmatdaşlygyň çäklerinde Türkmenistanyň birnäçe ýokary okuw mekdeplerinde, hususan-da Halkara ynsanperwer ylymlary we ösüş uniwersitetinde hem-de Döwletmämmet Azady adyndaky Türkmen milli dünýä dilleri institutynda italýan dili ulgamlaýyn esasda okadylýar.

Munydan başga-da, iki ýurduň uniwersitetleriniň arasynda göni gatnaşyklary pugtalandyrýan resminamalar durmuşa geçirilip, Italiýanyň belli bilim ojagy bolan Neapol welaýatynyň Fridrih II adyndaky uniwersiteti (Università degli Studi di Napoli Federico II) bilen Türkmenistanyň ylym-bilim edaralarynyň arasynda hyzmatdaşlyk işjeň ýola goýulýar.