Türkmenistan 2026-njy ýylyň 22–24-nji iýulynda Ankara şäherinde geçirilen BMGÖM-niň Ösüş strategiýasy we maliýeleşdiriş platformasynyň çäklerindäki syýasaty işläp taýýarlamak boýunça sebit maslahatynda adam maýasynyň ösdürilmegine we onuň ykdysady özgertmelerdäki ornuna bolan garaýyşlaryny hödürledi. Çäre döwlet edaralarynyň wekillerini, BMGÖM-niň ýolbaşçylaryny, Ýewropa we Merkezi Aziýa ýurtlarynyň bilermenlerini strategik meýilnamalaşdyrmak, ösüşi maliýeleşdirmek, maglumatlary netijeli peýdalanmak we döwlet syýasatynyň durmuşa geçirilişini kämilleşdirmek boýunça tejribe alyşmak üçin bir ýere jemledi

Türkmenistanyň hödürlän çemeleşmesiniň merkezinde adam maýasy ykdysady ösüşiň esasy hereketlendiriji güýçleriniň biri hökmünde çykyş edýär. Bilime goýulýan maýa goýumlary adam maýasynyň hilini ölçemek mümkin bolanda we hünärmenleri taýýarlamak ykdysadyýetiň häzirki hem-de geljekki zerurlyklary bilen gönüden-göni baglanyşdyrylanda has ýokary ykdysady netijeliligi üpjün edýär.

Soňky ýyllarda Türkmenistanda ýokary bilime elýeterlilik giňeldildi, bilim standartlary we maksatnamalary täzelendi, ýokary okuw mekdepleriniň işiniň netijelerini yzygiderli seljermäge mümkinçilik berýän sanly baha beriş we reýting ulgamy ornaşdyryldy. Bu tejribe möhüm ýörelgäni görkezýär: netijeler ölçenilýän we aýdyň bolanda, maglumatlar hili ýokarlandyrmagyň we dolandyryşy kämilleşdirmegiň amaly guralyna öwrülýär.

Indiki ädim bu çemeleşmäni zähmet bazary we ykdysady ösüş bilen gönüden-göni baglanyşdyrmakdan ybaratdyr. Türkmenistan BMGÖM bilen bilelikde bilimiň we başarnyklaryň hilini, demografik meýilleri hem-de geljekde taýýarlanjak hünärmenleriň sanyny zähmet bazarynyň islegi, öndürijilik we ykdysady ösüşiň geljegi bilen utgaşdyrýan adam maýasyny strategik meýilnamalaşdyrmak çemeleşmesini ösdürýär.

Şeýle hem Türkmenistanyň işläp taýýarlan demografik-ykdysady modeli we ssenariý prognozlaşdyrmak üçin programma üpjünçiligi hödürlenildi. Olar bilim, iş üpjünçiligi, başarnyklary ösdürmek we öndürijilik boýunça dürli çözgütleriň zähmet serişdelerine hem-de ykdysady ösüşe ýetirip biljek täsirini bahalandyrmaga mümkinçilik berýär.

Esasy maksat üznüksiz ulgamy döretmekdir: adam maýasyna baha bermek → ykdysadyýetiň geljekki zerurlyklaryny çaklamak → bilim we hünär taýýarlygyny uýgunlaşdyrmak → iş üpjünçiliginiň we öndürijiligiň netijelerini seljermek → döwlet syýasatyny degişli derejede kämilleşdirmek.

Türkmenistanyň demografik mümkinçiliklerini nazara almak bilen, esasy wezipe adam mümkinçiliklerini ýokary öndürijilige, innowasiýalara, tehnologik ösüşe we ýokary goşulan gymmaty döredýän ykdysady işjeňlige öwürmekden ybaratdyr.

Adam maýasy diňe şu günki ykdysadyýetiň zerurlyklaryna jogap bermän, eýsem geljegiň ykdysadyýetini kemala getirýän esasy güýçleriň birine öwrülmelidir.

Türkmenistanyň Bilim ministrligi