Türkmenistan Minskde geçirilen «Ylym festiwalynda» ylmy işläp taýýarlamalaryny görkezdi

Türkmenistanyň Oguz han adyndaky Inžener-tehnologiýalar uniwersitetiniň biotehnologiýa kafedrasynyň müdiri O.Soltanowa bilen molekulýar biologiýa we genetika kafedrasynyň müdiri D.Porrykow gulluk iş sapary bilen Minsk şäherinde bolup, 5–6-njy sentýabrda geçirilen «Ylym festiwaly — 2026» atly çärä gatnaşdylar. Çäräniň guramaçysy Belarusyň Milli ylymlar akademiýasy boldy.

«Ylym festiwaly» sekizinji gezek geçirilýär we Belarusyň iň iri meşhur ylmy çäreleriniň biri bolup durýar. Ol köp ýyllaryň dowamynda Minskiň ýaşaýjylaryny we myhmanlaryny ylmyň iň täze gazananlary bilen tanyşdyrýar hem-de olara ylym we tehnologiýa dünýäsinden täze bilimleri almaga ýardam edýär.

Festiwalyň dowamynda Belarusyň Milli ylymlar akademiýasynyň ähli ylmy-barlag institutlary we merkezleri öz innowasion işläp taýýarlamalaryny görkezdiler. Türkmen uniwersitetiniň wekilleri biotehnologiýa ugry boýunça taýýarlanan taslamalar bilen çykyş etdiler. Olaryň taýýarlan ylmy çözgütleri festiwala gatnaşyjylarda uly gyzyklanma döretdi.

Türkmen mugallymlary Belarusyň dürli ylmy-barlag institutlarynyň professorlary hem-de ylmy işgärleri bilen genetika we seleksiýa, mikrobiologiýa, azyk hem-de oba hojalyk biotehnologiýasy ugurlary boýunça alnyp barylýan işler barada pikir alyşdylar.