Türkmenistanda sanly ulgam arkaly halkara ylmy-amaly maslahatlary geçirmek meýilleşdirilýär

Türkmenistanyň Prezidenti Serdar Berdimuhamedow 11-nji sentýabrda sanly ulgam arkaly Ministrler Kabinetiniň nobatdaky mejlisini geçirdi. Mejlisiň dowamynda Ministrler Kabinetiniň Başlygynyň orunbasary Batyr Mämmedow şu ýylyň oktýabr aýynda ýurdumyzyň birnäçe ýokary okuw mekdeplerinde halkara ylmy-amaly maslahatlary geçirmek boýunça alnyp barylýan taýýarlyk işleri barada hasabat berdi. «Türkmenistan: Altyn asyr» elektron gazeti.

Bellenilişi ýaly, milli bilim ulgamyny döwrebaplaşdyrmak, ýaşlaryň döredijilik we intellektual mümkinçiliklerini ösdürmek, ýokary hünärli hünärmenleri taýýarlamak boýunça yzygiderli işler alnyp barylýar. Bu ugurda halkara olimpiadalaryň, forumlaryň, sergileriň we ylmy-amaly maslahatlaryň geçirilmegi bilim ulgamynda tejribäni baýlaşdyrmaga ýardam berýär.

2026-njy ýylyň oktýabrynda Türkmen döwlet binagärlik-gurluşyk institutynda “Gurluşyk we senagat toplumynda innowasion tehnologiýalaryň orny”, Türkmenistanyň Oguz han adyndaky Inžener-tehnologiýalar uniwersitetinde bolsa “Milli emeli aň tehnologiýalary: sanly ykdysadyýet, «akylly» diwersifikasiýa, durnukly ösüş” atly halkara ylmy-amaly maslahatlaryň geçirilmegi meýilleşdirilýär.

Sanly ulgam arkaly guraljak bu maslahatlara ýurdumyzyň ýokary okuw mekdepleriniň talyplarynyň, professor-mugallymlarynyň, alymlarynyň, şeýle hem daşary ýurtlaryň abraýly ýokary okuw mekdepleriniň we iri halkara guramalarynyň wekilleriniň gatnaşmagyna garaşylýar.

Çäreleriň dowamynda “ýaşyl”, howpsuz we “akylly” şäherleriň ösdürilmegi, innowasion gurluşyk serişdeleriniň önümçiligi, önümçilik prosesleriniň awtomatlaşdyrylmagy, robot tehnologiýalarynyň ornaşdyrylmagy, ykdysadyýeti sanlylaşdyrmak we emeli aň tehnologiýalarynyň mümkinçiliklerini ulanmak ýaly möhüm ugurlar boýunça dünýä tejribesini öwrenmek göz öňünde tutulýar.

Türkmenistanyň Prezidenti hasabaty diňläp, ýokary bilimli hünärmenleri taýýarlamakda, ylym-bilim ulgamynda halkara hyzmatdaşlygy ösdürmekde alnyp barylýan işleriň möhümdigini belledi. Döwlet Baştutanymyz sanly ulgam arkaly halkara ylmy-amaly maslahatlary geçirmek boýunça taýýarlanan teklibi goldap, wise-premýere bu ugurda degişli işleri dowam etdirmegi tabşyrdy.