TITU-nyň mugallymy halkara sebit maslahatyna gatnaşdy

Türkmenistanyň Oguz han adyndaky Inžener-tehnologiýalar uniwersitetiniň Dil öwreniş bölüminiň mugallymy Gyzylgül Ekäýewa ABŞ-nyň “C5+Opening Networks in English” (C5+O.N.E.) maksatnamasynyň çäklerinde 2026-njy ýylyň 23–28-nji awgusty aralygynda Gazagystan Respublikasynyň Almata şäherinde geçirilen “Shaping Tomorrow: C5+O.N.E. U.S.-Central Asia Regional Conference on Economic Growth” atly sebit maslahatyna gatnaşdy.

Maslahata Merkezi Aziýanyň bäş döwletinden 150-den gowrak maksatnama uçurymy, ABŞ-nyň ilçihanalarynyň wekilleri, bilermenler we American Councils guramasynyň ýolbaşçylary gatnaşdylar. Çäräniň dowamynda ABŞ bilen Merkezi Aziýa ýurtlarynyň arasynda ykdysady hyzmatdaşlygy ösdürmek, telekeçilik, hünär taýýarlygy, iňlis dili boýunça aragatnaşyk başarnyklaryny kämilleşdirmek we hünär gatnaşyklaryny giňeltmek meseleleri ara alnyp maslahatlaşyldy.

Maslahatyň çäklerinde bilermenleriň çykyşlary, işewür taslamalaryň tanyşdyrylyşlary, pikir alyşmalar, networking duşuşyklary we medeni çäreler geçirildi. Şeýle hem ABŞ-nyň garaşsyzlygynyň 250 ýyllygy mynasybetli “Freedom 250” atly medeni agşam guraldy.

Üç gün dowam eden maslahat gatnaşyjylara täze bilimleri we tejribeleri edinmäge, Merkezi Aziýanyň beýleki ýurtlarynyň wekilleri bilen hünär gatnaşyklaryny pugtalandyrmaga hem-de geljekki hyzmatdaşlygyň täze mümkinçiliklerini ara alyp maslahatlaşmaga giň mümkinçilik berdi.