«KIDS EKSPO: ÄHLI ZAT ÇAGALAR ÜÇIN» ATLY HALKARA SERGI - ÝARMARKASY

2024-nji ýylyň 19-22-nji awgusty aralygynda Aşgabat şäherinde «Kids Ekspo: ähli zat çagalar üçin» halkara sergi-ýarmarkasy geçirilýär. Bu waka çagalaryň önümleri we hyzmatlary pudagynda möhüm pursat bolup, işewürler üçin bazar segmentiniň ösmegine goşant goşmaga ajaýyp mümkinçiligi döreder.

«Garagum» myhmanhanasynyň ýanynda ýerleşýän Göçme sergi merkezinde ýaýbaňlandyrylan «Kids Ekspo» sergisiniň açylyş dabarasynda dürli önümler bilen bezelen sergi pawilýonlaryny şatlyk-şowhun we çagalaryň gülküsi gurşap aldy. Bu ýerde oýunjaklardyr okuw esbaplaryndan başlap, döwrebap egin-eşikleri, peýdaly azyk önümleri we innowasion bilim programmalary, garaz çaga durmuşynyň ähli ugurlaryny öz içine alýan harytlaryň we hyzmatlaryň köpsanly görnüşleri hödürlenýär.

Bu halkara sergä daşary ýurtly kompaniýalaryň, ýurdumyzyň degişli edaralarynyň wekilleri bilen birlikde Türkmenistanyň Daşary işler ministrliginiň Halkara gatnaşyklary institutynyň talyplary hem gatnaşdylar.

Täsirli sergini synlamak bilen oňa gatnaşyjylar ajaýyp işleriň sakasynda duran türkmen halkynyň milli Lideri Gahryman Arkadagymyza, hormatly Prezidentimiz Arkadagly Gahryman Serdarymyza dünýä döwletleri bilen medeni-ynsanperwer ugurdaky netijeli hyzmatdaşlygy ösdürmekde il-ýurt bähbitli, umumadamzat ähmiýetli işleriniň hemişe rowaçlyklara beslenmegini arzuw etdiler.

Suraý NAZAROWA,

Türkmenistanyň Daşary işler ministrliginiň

Halkara gatnaşyklary institutynyň

Halkara žurnalistikasy fakultetiniň II ýyl talyby

Çeşmesi: Halkara gatnaşyklary instituty