Zenan – Zeminiň zynaty

Halkara senagatçylar we telekeçiler uniwersitetinde Halkara Zenanlar güni mynasybetli “Zenan – Zeminiň zynaty” atly aýdym-sazly medeni çäresi geçirildi. Çäräniň başynda uniwersitetiň professor-mugallymlary we hormatly myhmanlary tarapyndan zenan mertebesini dabaralandyrýan Gahryman Arkadagymyza hem-de Arkadagly Gahryman Serdarymyza alkyş sözlerini beýan etdiler.

Häzirki wagtda türkmen zenanlary ýokary jemgyýetçilik-syýasy derejä eýe bolup, olaryň hukuklary we azatlyklary döwlet tarapyndan ygtybarly kepillendirilýär. Zenanlar — türkmen medeniýetinde mähribanlygyň, gözelligiň, arassa ahlaklylygyň we maşgala mukaddesliginiň nusgasy hökmünde wasp edilýär. Olar enelik mähri, çeper elliligi we zähmetsöýerligi bilen jemgyýetiň diregi bolup, edebiýatda we sungatda uly hormat bilen sarpalanýar. Ýurdumyzda Halkara Zenanlar güni mynasybetli "Ene mähri" ýaly hormatly atlaryň berilmegi eneleriň mertebesiniň belentdigini görkezýär. 

Halkara senagatçylar we telekeçiler uniwersitetinde geçirilen medeni çärä ýurdumyzyň at gazanan sungat ussatlary, “Ýylyň parlak ýyldyzy” bäsleşiginiň ýeňijisi Göwher Hajymyradowa hem-de halypa mugallymlar gatnaşyp, türkmen zenanlarynyň mertebesi, ene-mamalarymyzdan gelýän asylly ýol-ýörelgeleri, däp-dessurlary, maşgala mukaddesligi barada çykyş etdiler. Çäräniň dowamynda uniwersitetiň “Işewürler” döredijilik toparynyň ýerine ýetirmeklerinde aýdym-sazly tanslara tomaşa edildi.