Türkmen alymy Belarusyň «Çagyrylan professor» maksatnamasyna gatnaşýar
Türkmenistanyň Oguz han adyndaky Inžener-tehnologiýalar uniwersitetiniň amaly matematika we informatika kafedrasynyň müdiri, fizika-matematika ylymlarynyň kandidaty Maral Bekiýewa 18–24-nji oktýabr aralygynda Belarus Respublikasynyň Grodno şäherinde iş saparynda bolýar. Türkmen alymy Ýanka Kupala adyndaky Grodno döwlet uniwersitetiniň (GDU) çakylygy boýunça «Çagyrylan professor» maksatnamasynyň çäklerinde belarus talyplaryna leksiýa okamak we baý tejribesini paýlaşmak üçin bardy. Bu barada «Türkmenistan: Altyn asyr» elektron gazeti habar berdi.
Bu waka halkara akademiki gatnaşyklaryň tejribesinde Türkmenistandan bir mugallymyň daşary ýurt ýokary okuw mekdebi tarapyndan şeýle ýokary derejede çakylyk almagynyň ilkinji mysalydyr. Bu başlangyç türkmen matematika mekdebiniň halkara derejesindäki abraýynyň we alymlaryna bolan uly ynamyň aýdyň nyşanyna öwrüldi. GDU-nyň rektory öz çakylyk hatynda bu saparyň iki ýurduň akademiki jemgyýetçilikleriniň arasyndaky dostlukly we işewür gatnaşyklary berkitjekdigine ynam bildirdi.
Maksatnamanyň çäklerinde Maral Bekiýewa GDU-nyň matematika we informatika fakultetiniň «Programma inženeriýasy», «Matematika» hem-de «Amaly matematika» ugurlarynda bilim alýan talyplaryna leksiýa okaýar. Sapaklar takyk matematika teoriýasynyň inženerçilik hasaplamalaryndan başlap, ekologiýa modelirlemesine çenli hakyky wezipeler bilen baglanyşygyny amaly taýdan görkezmäge gönükdirilendir. Şeýle hyzmatdaşlyk talyplara derslere täzeçe garamaga, mugallymlara bolsa usulyýet alyşmaga mümkinçilik berýär.
Sapar diňe bir bilim bermek bilen çäklenmän, eýsem uniwersitetleriň arasynda geljekki bilelikdäki ylmy barlaglary we bilim taslamalaryny ösdürmek üçin hem esas döredýär. Maral Bekiýewanyň ylmy barlaglary gurak sebitleriň şertlerinde ýerasty suwlaryň gidrogeoekologiýa ýagdaýyny modelirlemek üçin emeli aňy ulanmaga gönükdirilendir. Onuň matematiki seljerme, differensial deňlemeler, matematiki modelirleme we ähtimallyklar teoriýasy boýunça baý mugallymçylyk tejribesi Belarusyň akademiki gurşawynda ýokary baha eýe boldy.
